2012-ի երկրորդ եռամսյակում ռեկորդային՝ 960 հազար դոլար են կազմել Facebook սոցիալական ցանցի ծախսերը ԱՄՆ Կոնգրեսում սեփական շահերի լոբբինգի համար: Այդ գումարը ռեկորդային է դարձել սոցցանցի համար լոբբինգի վրա մեկ եռամսյակում ծախսված գումարների վիճակագրությունում: Այս մասին գրում է All Things Digital-ը:
Այս տարվա երկրորդ եռամսյակում սոցիալական ցանցը լոբբինգի համար ծախսել է կրկնակի շատ, քան աշխարհի խոշորագույն տեխնոլոգիական Apple ընկերությունը, որը ծախսել է ընդամենը 470 հազար դոլար: Apple-ը, 2011-ի երկրորդ եռամսյակի համեմատ, կրճատել է լոբբինգի ծախսերը 40 տոկոսով:
Հարցերի շարքում, որոնցով Facebook-ն առաջ է քաշել իր հետաքրքրությունները, եղել են օգտատերերի, մասնավորապես անչափահասների, անձնական տվյալների պաշտպանությունը, ինֆորմացիոն անվտանգությունը և օգտատերերի պաշտպանությունը գործատուներից, որոնք պահանջում են իրենց տրամադրել իրենց էջերի ծածկագրերը:
Սոցցանցի ներկայացուցիչները կոնգրեսականների հետ քննարկել են նաև օնլայն գովազդին, սոցցանցի էներգաարդյունավետ աշխատանքին, մտավոր սեփականության պաշտպանությանը և ֆոնդային բորսա դուրս գալուց հետո շուկայում աշխատանքների կազմակերպմանն ու ինտերնետ-արդյունաբերությանը վերաբերող մի շարք այլ հարցեր:
Նշենք, որ 2011-ի երկրորդ եռամսյակի տվյալներով՝ Facebook-ը զգալիորեն ավելացրել է լոբբինգի ծախսերը: 2011-ի նշված ժամանակահատվածում ընկերությունը ծախսել էր 1,35 միլիոն դոլար:
Սակայն, ինչպես երևում է, Facebook-ը 4 անգամ ավելի քիչ է ծախսել լոբբինգի վրա, քան Google ընկերությունը: Ինտերնետ հսկան այդ նպատակով 2012-ի երկրորդ եռամսյակում ծախսել է 3,92 միլիոն դոլար՝ ավելացնելով ծախսերը 90 տոկոսով՝ անցած տարվա նույն ժամանակահատվածի հետ համեմատ։
Google-ը կոնգրեսականների հետ քննարկել է ինտերնետ գովազդի շուկայի կարգավորմանը, մրցակցության պահպանմանը, օգտատերերի տվյալների պաշտպանությանը, արտոնագրային իրավունքների կարգավորմանը վերաբերող հարցեր:
Հիշեցնենք, որ ԱՄՆ-ն, ԵՄ-ն ու մի շարք այլ երկրներ Google-ի հասցեին ասել էին, թե այն կիրառում է աշխարհում խոշորագույն իր որոնողական համակարգը՝ առաջ տանելու համար իր սեփական ծառայությունները՝ վնաս հասցնելով շուկայի մյուս անդամներին, ինչպես նաև իր արտոնագրերով սահմանափակելով մրցակցությունը օնլայն գովազդի շուկայում:
Լոբբինգի համար ծախսված միջոցներով առաջատար ամերիկյան մյուս ՏՏ ընկերությունների թվում են Hewlett-Packard-ը (2,12 մլն դոլար), Microsoft-ը (2 միլիոն դոլար), Oracle-ը (1,47 մլն դոլար) և IBM-ը (1 մլն դոլար):
