Աշխարհում պողպատի արտադրությունը (62 երկրում՝ ներառյալ Չինաստանը) 2012-ի հունիսի տվյալներով կազմել է 127,9 միլիոն տոննա՝ նախորդ ամսվա 131,2 միլիոն տոննայի փոխարեն: Տվյալներն իր զեկույցում ներկայացնում է World Steel Association միջազգային վերլուծական կենտրոնը:
RBK-ի փոխանցմամբ՝ հաշվետու ամսում աշխարհում արտադրությունը նվազել է 3,3 միլիոն տոննայով կամ 2,5 տոկոսով՝ հասնելով այս տարվա ամենացածր մակարդակին: Հունիսին պողպատի արտադրությունը նվազել է աշխարհի բոլոր հատվածներում, այդ թվում՝ Չինաստանում, որտեղ պողպատի արտադրությունը հունիսին եղել է 60,2 միլիոն տոննա՝ մայիս ամսվա 61,2 միլիոն տոննայի դիմաց:
2011-ի հունիսի հետ համեմատած՝ աշխարհում պողպատի արտադրությունը նվազել է 0,1%-ով: Այն ժամանակ արտադրությունը կազմել է 128 միլիոն տոննա:
2012-ի առաջին վեց ամիսներին աշխարհում արտադրվել է 766,9 միլիոն տոննա պողպատ՝ նախորդ տարվա նույն ժամանակահատվածի 760,2 միլիոն տոննա արտադրանքի փոխարեն: Այպիսով՝ այս տարվա սկզբից աշխարհում պողպատի արտադրությունն աճել է 0,9%-ով:
