Բրազիլացի գարեջրագործները շուկա են բաց թողնում հատուկ շների համար նախատեսված գարեջուր: Նոր արտադրանքը արդեն համտեսել են չորքոտանի դեգուստրատորները: Արտադրանքը վաճառակետերում կհայտնվի օգոստոսին: Այս մասին հաղորդում է Itar-Tass-ը:
«Շների տերերը սովորաբար սիրում են կենդանիների հետ կիսել ոչ միայն իրենց ժամանակը, այլև սնունդը, այնպես որ՝ մեր արտադրանքը կգտնի իր սպառողին»,-լրագրողների հետ զրույցում նշել է նոր ապրանքանիշի սեփականատեր, ձեռնարկատեր Մարկու Մելուն:
Շների գարեջրի բաղադրությունը մշակվել է Ռիո դե Ժանեյրոյի «Սենայ» տեխնոլոգիական ինստիտուտի գարեջրագործական բաժանմունքում: Հայտնի է, որ դրա բաղադրության մեջ մտնում են ածիկ և մսային համեմունքներ: Դեռևս հայտնի չէ, թե նորույթին ինչպես կարձագանքեն կատուները, սակայն չի բացառվում, որ նորարարները չեն սահմանափակվի միայն շների համար գարեջուր արտադրելով: Կատուների գարեջուրը կունենա ձկան համ:
Շների գարեջուրը ալկոհոլ չի պարունակում, այլապես այն նրանց դուր չէր գա:
Ձեռնարկատերը վստահեցնում է, որ առաջիկայում սպասվում է «մարդու լավագույն ընկերների» համար նոր ըմպելիքների մի ողջ շարք, այդ թվում՝ ոչ ալկոհոլային գինի, բնական մրգային հյութեր և նույնիսկ հատուկ էներգետիկ ըմպելիք: Իսկ նվազեցված շաքարի պարունակությամբ պաղպաղակն արդեն հայտնվել է վաճառակետերում:
Ենթադրվում է, որ ըմպելիքները մեծ պահանջարկ կունենան երկու տարի անց Բրազիլիայում կայանալիք Ֆուտբոլի աշխարհի առաջնության խաղերի ժամանակ:
