ԼՂՀ կենտրոնական ընտրական հանձնաժողովը հուլիսի 22-ի նիստում, տարածքային ընտրական հանձնաժողովներից ստացված` ընտրական տեղամասերում քվեարկության արդյունքների արձանագրությունների հիման վրա, ամփոփել է և արձանագրությամբ վավերացրել ԼՂՀ նախագահի հուլիսի 19-ի ընտրության արդյունքները:
Առաջնորդվելով ԼՂՀ ընտրական օրենսգրքի դրույթներով և հիմք ընդունելով վերոնշյալ արձանագրությունը` ԼՂՀ նախագահի հուլիսի 19-ի ընտրության արդունքում բոլոր թեկնածուներին կողմ քվեարկած ընտրողների բացարձակ մեծամասնության քվեները ստանալու կապակցությամբ Կենտրոնական ընտրական հանձնաժողովը Բակո Սահակյանին հայտարարել է ընտրված ԼՂՀ նախագահ: Կենտրոնական ընտրական հանձնաժողովը արձանագրեց.
ԼՂՀ ընտրողների ընդհանուր թիվն ըստ ընտրողների ցուցակների կազմում է` 99227,
Տեղամասային ընտրական հանձնաժողովներին հատկացված քվեաթերթիկների թիվը` 102283,
Մարված (չօգտագործված, ոչ ճիշտ լրացված և հետ վերադարձված) քվեաթերթիկների թիվը` 29324,
Գրանցված և քվեաթերթիկ ստացած ընտրողների թիվն ըստ ստորագրությունների` 72958,
Անվավեր քվեաթերթիկների թիվը` 2302,
Յուրաքանչյուր թեկնածուին կողմ քվեարկված քվեաթերթիկների թիվը կազմում է`
Բալասանյան Վիտալի Միխայիլի 22967,
Սահակյան Բակո Սահակի – 47095,
Սողոմոնյան Արկադի Իվանի – 593:
Կողմ քվեարկված քվեաթերթիկների ընդհանուր թիվը` 70655,
Վավեր քվեաթերթիկների թիվը` 70655,
Անճշտությունների չափը` 4:
ԿԸՀ նախագահ Ռաշիդ Պետրոսյանը հանձնաժողովի անունից երախտագիտություն է հայտնել կենտրոնական, տարածքային և տեղամասային ընտրական հանձնաժողովների անդամներին, միջազգային և տեղական դիտորդներին, լրագրողներին, Կենտրոնական ընտրական հանձնաժողովի մամլո կենտրոնի աշխատակիցներին, հասարակական կազմակերպություններին, Արտաքին գործերի նախարարության, Պաշտպանության բանակի, ազգային անվտանգության, ոստիկանության և հակահրդեհային անվտանգության ծառայությունների, պետական կառավարման և տեղական ինքնակառավարման մարմինների, կապի, էլեկտրամատակարարման և սպասարկման ոլորտների այն աշխատողներին, որոնք աջակցել են ընտրական հանձնաժողովներին` ԼՂՀ նախագահի ընտրության գործընթացը պատշաճ մակարդակով կազմակերպելու և անցկացնելու համար:
«Կենտրոնական ընտրական հանձնաժողովի նախագահը երախտագիտություն է հայտնել նաև ԼՂՀ բոլոր քաղաքացիներին, որոնք ԼՂՀ Նախագահի ընտրության քվեարկությանը ակտիվ մասնակցությամբ մեկ անգամ ևս հավաստեցին իրենց նվիրվածությունը Արցախի պետականության կայացման և ժողովրդավարության հետագա զարգացման գործին:
