Այսօր ՀՀ կառավարության շենքի առջև բողոքի ցույց անցկացրին փողոցային առևտրով զբաղվող քաղաքացիները, որոնք ներկայումս զրկված են իրենց նախկին աշխատանքով հանապազօրյա հաց վաստակելու հնարավորությունից:
Բողոքի ակցիային մասնակցում էին նաև ԱԺ «Ժառանգություն» խմբակցության պատգամավոր Լ.Ալավերդյանը և «Ժառանգություն» կուսակցության վարչության անդամ Կարինե Հակոբյանը:
Չնայած ակցիայի մասնակից շուրջ 70 քաղաքացիներ գրեթե մեկ ժամ տևած բողոքի ընթացքում, պաստառները ձեռքներին, վանկարկում էին` «Ամոթ, պահանջում ենք աշխատանք», և այլն, սակայն կառավարության շենք ելումուտ անող պաշտոնյաներից որևէ մեկը չմոտեցավ ցուցարարներին` լսելու նրանց պահանջը:
Այնուհետև ցուցարարները երթով շարժվեցին դեպի Միացյալ ազգերի կազմակերպության հայաստանյան ներկայացուցչություն, որտեղ նրանց պատասխանել են, թե կառավարության հետ հանդիպման ժամանակ կբարձրացնեն այդ հարցը:
Փողոցային առևտրով զբաղվող քաղաքացիների բողոքը կոորդինացնող խումբ
