Իսրայելը պաշտոնական բողոք է ներկայացրել ՄԱԿ-ի Անվտանգության խորհուրդ` Սիրիայի իշխանությանը մեղադրելով իր ռազմական ուժերը Գոլանի բարձունքների ապառազմականացված գոտում տեղակայելու մեջ: Բողոքում նշվում է, որ «այդ քայլը կարող է հանգեցնել ամենալուրջ հետևանքների»:
Ինչպես տեղեկացնում է Rosbalt.ru-ն, սիրիական ուժերը դիրքեր են զբաղեցրել Ջուբատա գյուղի շրջանում, որը շատ մոտ է Իսրայելի հետ սահմանին: Իսրայելի ԱԳՆ աղբյուրը ընդգծել է, որ Իսրայելում ամենայն լրջությամբ են մոտենում այդ հարցին` մտավախություն ունենալով Սիրիայում անկայունության ֆոնին հակամարտության սրումից: Նա նշել է, որ երկրի իշխանությունները ՄԱԿ-ի Անվտանգության խորհրդից պահանջել են անհետաձգելի միջամտություն ցուցաբերել բարդացող իրավիճակում:
Գոլանի բարձունքներում բուֆերային կամ ապառազմականացված գոտին հաստատվել է 1974 թվականին: Պայմանագրի համաձայն` երկու երկրները իրավունք չունեն իրենց զորքերը տեղակայել սահմանից 3-6 կմ հեռավորության վրա: Իսկ պայմանագրին հետևելու վերահսկողությունը իրականացնում են ՄԱԿ-ի խաղաղարար ուժերը:
Իսրայելում հատուկ ուշադրությամբ են հետևում սիրիական հակամարտության զարգացմանը` մտավախություն ունենալով քիմիական զենքի կիրառումից:
Օրեր առաջ Իսրայելի զինվորական հրամանատարությունը որոշում էր կայացրել բանակի պատրաստվածությունը բարձրացնելու մասին` պայմանավորված Սիրիայում ընթացող մարտերով: Մշակվել է գործողութունների ծրագիր, որը կգործարկվի այն դեպքում, երբ երկիրը բախվի Սիրիայի փախստականների հոսքին:
