Նոր մանրամասներ. վթարի արդյունքում մահացած երիտասարդ աղջիկը Ջերմուկի քաղաքապետի ազգականն էր (լուսանկարներ)

Պարզվել է այսօր Արարատի մարզում վթարի հետևանքով մահացած և վիրավոր անձանց ինքնությունը: 

Ֆոտոլրագրող Գագիկ Շամշյանը News.armeniatv.com-ին հայտնել է, որ հիվանդանոց էին տեղափոխվել «Ֆոլկսվագեն Պասատ» մակնիշի 11 MM 901 համարանիշի վարորդ, 23-ամյա Սիրանույշ Տեր-Թադևոսյանը, ուղևորներ, 25-ամյա Լիլիա Հակոբյանը և 26-ամյա Ստելա Յուզբաշյանը: 3-ն էլ տեղափոխվել էին «Արարատ» բժշկական կենտրոն: 

Իսկ մահացածը ուղևոր, 26-ամյա Սառա Գալստյանն էր: 

Գ. Շամշյանը հայտնել է, որ Լ. Հակոբյանն ու Ս. Յուզբաշյանը տեղափոխվել են «Էրեբունի» բժշկական կենտրոն: 

Վթարի հետևանքով մահացած Ս. Գալստյանը Ջերմուկի քաղաքապետ Վարդան Հովհաննիսյանի ազգականն էր, և մասնագիտությամբ՝ վարդահար: 

Ավելի վաղ  News.armeniatv.com-ը հայտնել էր, որ այսօր` հուլիսի 22-ին, ավտովթար է տեղի ունեցել Արարատի մարզում: Ժամը 18.00-ի սահմաններում «Ֆոլցվագեն Պասատ» մակնիշի 11 MM 901 համարանիշի ավտոմեքենայի վարորդը Երևան-Մեղրի ավտոճանապարհի 72 կմ հատվածում դուրս է եկել երթևեկելի գոտուց և գլխիվայր շրջվել: 

Ինչպես դեպքի վայրից News.armeniatv.com-ին հայտնել էր ֆոտոլրագրող Գագիկ Շամշյանը, ավտովթարի հետևանքով մի հոգի մահացել է, ևս 3-ը տեղափոխվել էին Վեդիի և Արարատի բժշկական կենտրոններ:

Ֆոտոլրագրողը հայտնել էր, որ ավտոմեքենայի վարորդը եղել է Վայոց Ձորի մարզի Ջերմուկ քաղաքի Ազատամարտիկների փողոցի բնակիչ Սիրանուշ Տեր-Թադևոսյանը, ով երիտասարդ աղջիկ է: Ավտոմեքենայում եղել է 3 ուղևոր, ովքեր ևս երիտասարդ աղջիկներ են եղել:  

Դեպքի վայր են ժամանել Ճանապարհային ոստիկանության 2-րդ սպայական գումարտակի 1-ին վաշտի աշխատակիցները` հրամանատար Տիգրան Գրիգորյանի գլխավորությամբ: Վթարի վայր է ժամանել նաև Ոստիկանության Արարատի բաժնի օպերատիվ խումբը ` քրեական հետախուզության բաժնի ավագ օպերլիազոր Վազգեն Պետրոսյանի գլխավորությամբ:

Դեպքի վայրում քննչական աշխատանքները ղեկավարում էին Ոստիկանության քննչական գլխավոր վարչության Արարատի մարզի քննչական բաժնի քննիչ Արշակ Թարվերդյանը: 

Դեպքի վայր է ժամանել ՃՈ 2-րդ սպայական գումարտակի հրամանատար, ոստիկանության փոխգնդապետ Արսեն Արշակյանը: 

Ֆոտոլրագրողը հայտնել է նաև, որ ավտովթարից հետո վիրավորներին առաջին օգնությունը ցույց են տվել այդտեղով անցնող պատահական մարդիկ:

 

Լուսանկարները` Գագիկ Շամշյանի