«Ես գնացել էի Գյումրի` վարորդներին պաշտպանելու. բայց չգիտես ինչ շոու էին այնտեղ սարքել: Իմ մասին հայտնի թերթերը գրում են, թե Վարդան Ղուկասյանի հետ հաց է կերել, չգիտեմ ինչ է արել: Ես իշխանավորների հետ ընդհանրապես գործ չունեմ ու այս 10 տարվա ընթացքում չեմ էլ ունեցել: Աստված վկա, Ղուկասյանի հետ չեմ հանդիպել, ով որ գրում է, ով որ հանդիպել է, թող Աստված իրեն պատժի»,- հանրահավաքից հետո լրագրողների հետ զրույցի ժամանակ բորբոքված ասաց ԺԿ առաջնորդ Տիգրան Կարապետյանը:
Կարապետյանը սրիկա անվանեց բոլոր նրանց, ովքեր ասում են, թե ինքը Վարդան Ղուկասյանի կամ Գագիկ Ծառուկյանի հետ է հանդիպում. «Գրում են պատերի վրա, որ Կարապետյանը DVD է բաժանելու կամ հանրահավաքի ժամն են փոխում, դա իշխանական սրիկայական քայլեր են, որովհետև իշխանությունը չի լինում նախկին և այսօրվա: Իշխանությունը միշտ ստոր է եղել, ստոր էլ կլինի»:
Կարապետյանի համար հասկանալի չէ, թե ինչու են իրեն կանչում միանալու և միեւնույն ժամանակ ասում, թե ինքը իշխանությունների հետ է: «Հայկական ժամանակ» օրաթերթի լրագրողի հարցին, թե ո՞վ է դա ասում` Կարապետյանը պատասխանեց. «Դուք, Ձեր թերթն է ասում` արի միացի»:
«Մենք ասում եք միացեք մեր թերթի՞ն»,- հարցրեց լրագրողը:
«Չէ բա բաբոյիդ միանամ»,- պատասխանեց Կարապետյանը և խնդրեց, որ չնմանվեն «բուլվարային թերթերի և սկանդալային հերյուրանքներ գրեն»: