Սիրիական ազատ բանակը ձևավորում է հատուկ ջոկատ, որն ապահովելու է քիմիական զենքերի պահեստների անվտանգությունը:
«Մենք ունենք ջոկատ, որը զբաղվելու է միայն քիմիական զենքով: Նրանք արդեն նախապատրաստվել են դրա անվտանգությունն ապահովելու համար»,- The Daily Telegraph-ը մեջբերում է Թուրքիա փախած սիրիացի գեներալ Ադնան Սիլի խոսքերը, ով պատասխանատու է եղել քիմիական զենքի համար:
Նրա խոսքերով քիմիական զենքի երկու հիմնական պահեստները գտնվում են Դամասկոսի արևելքում և Հոմսում:
Հիշեցնենք, որ Բաղդադում Սիրիայի նախկին դեսպան Նավաֆ ալ-Ֆարիսը հայտարարել էր, որ Բաշար ալ-Ասադի վարչակարգը կիրառել է քիմիական զենք: Ալ-Ֆարիսի խոսքերով` քիմիական զենքը կիրառվել է հիմնականում Հոմսում: Դրա հետ մեկտեղ նախկին դեսպանը չի մանրամասնել, թե հստակ երբ է կիրառվել այն: Նա նաև հավելել էր, որ սիրիական իշխանությունները պայթյուններ են կազմակերպում` համագործակցելով ալ-Քաիդայի հետ:
