Տիգրան Կարապետյանը, սկսելով իր հանրահավաքը, ասաց, որ բոլորը այսօր իր հասցեին հերյուրանքներ են տեղում, ասում են, թե Տիգրան Կարապետյանը պիտի գնա ու միանա ՀԱԿ-ին: Նա դիմեց ժողովրդին` հարցնելով. «Դուք կո՞ղմ եք, որ մենք միանանք ՀԱԿ-ին», և ժողովուրդը բացականչեց. «Ո՛չ»: «Մենք պայքարում ենք իշխանության դեմ, ոչ մի այլ ուժի դեմ չենք պայքարում: ՀԱԿ-ի լոզունգն է. ով մեզ հետ չէ, մեր դեմ է: Նման կարգախոսով մեր ժողովուրդը չի կարող միավորվել, ու մենք դեմ ենք նման կարգախոսի»,- ասաց Տիգրան Կարապետյանը:
Այնուհետև ժողովրդին ներկայացվեց ԺԿ-ի պատրաստած վերջնագրի տեսքը, որը տարվելու է նախագահական: Տեքստում, մասնավորապես, կոչ է արվում իշխանություններին անհապաղ ազատ արձակել քաղաքական այլախոհներին, ԼՂՀ հարցում հայանպաստ քայլեր իրականացնել, բացառել արևմտյան ուժերի խաղաղապահների մուտքը ազատագրված տարածքներ, աջակցություն ցուցաբերել ջավախահայությանը, բացառել ջրի, գազի սակագների բարձրացումը, վերականգնել փողոցային առևտուր անողների աշխատանքը կամ ապահովել նրանց համար այլընտրանքային աշխատանքային պայմաններ, բարձրացնել անապահովների նպաստը, կրկնապատկել նվազագույն սպառողական զամբյուղը:
Այդ և այլ պահանջների չկատարման դեպքում Տիգրան Կարապետյանը և նրա թիմակիցները փետրվարի 28-ին կդիմեն հայ ժողովրդին իշխանություններին անվստահություն հայտնելու պահանջով և կգնան արտահերթ ընտրությունների: Ի դեպ, տեղեկացնենք, որ Տիգրան Կարապետյանի հանրահավաքին մասնակցում էր և ելույթ ունեցավ «Ժառանգություն» կուսակցության նախկին անդամ Վարդան Խաչատրյանը: