Հոկտեմբերի 1-ին «էրեբունի» հիվանդանոցում ամուսնու` Խաղաղապահ գնդի պայմանագրային զինծառայող Յանիս Սարկիսովի ծեծի հետեւանքով մահացած 20-ամյա Զարուհի Պետրոսյանի սկեսուր Լիանա Սարկիսովան համարում է, որ այս ողբերգական պատմության մեջ միակ տուժողն ինքն է:
Հոկտեմբերի 1-ին «էրեբունի» հիվանդանոցում ամուսնու` Խաղաղապահ գնդի պայմանագրային զինծառայող Յանիս Սարկիսովի ծեծի հետեւանքով մահացած 20-ամյա Զարուհի Պետրոսյանի սկեսուր Լիանա Սարկիսովան համարում է, որ այս ողբերգական պատմության մեջ միակ տուժողն ինքն է: Այդ մասին տեղեկացնում է www.hra.am խմբագրությունը, որը այս գործով լրագրողական հետաքննություն է կատարել: «Էս ամեն ինչում տուժողը ես եմ: Ինքը եկավ իր համար ման եկավ, տունս էլ քանդեց, փաստորեն ես մնացի առանց ոչնչի: Ի՞նչ անիծվածի բերեց իմ տուն իմ «իդիոտ», «իշակ» որդին: Պետք ա իմանալ որտեղից ես աղջիկ բերում: Բերեցիր, ի՞նչ արեցիր: Ընտանիքս կործանեցիր»,- ասում է 20-ամյա աղջկա սկեսուրը` անթաքույց զայրույթով եւ ագրեսիվությամբ մեղադրելով իր որդուն` Զարուհուն տուն բերելու, իսկ Զարուհուն` մահանալու մեջ: Զարուհու քրոջ` Հասմիկի խոսքերով, հենց սկզբից հարս-սկեսուր հարաբերությունները լավ չեն եղել: Հարեւաններն էլ լրագրողին փոխանցել են. «Էն մի հարսին (մյուս տղայի) շատ լավ է վերաբերվում: Էս մանկատան երեխա էր, կարելի էր ծեծելով տանջամահ անել: Էն մեկը գլխին տեր ունի՚: Զարուհու հորաքույր եւ հարեւանուհի Շողիկը ասում է. «Կոնֆլիկտներ այդ ընտանիքում ամեն օր են եղել…Իրենք միշտ ճնշած են պահել երեխուն, ամեն օր սկեսուրն ու ամուսինը ծեծում էին, դասի կապտուկներով էր գնում»: Զարուհու սկեսուրը հարսից բողոքել է. «… Եթե օրինակ տղամարդը առավոտյան գնում է աշխատանքի, կին, վեր կաց երեկոյան հագուստը արդուկի, դիր: Առավոտյան շուտ սենց (դեմքը ծամածռելով ձեռքերը տարուբերում է) շալվարը անում ես, տալիս ես: Անուշադիր էր, փնթի, կոկիկ չէր»: Զարուհու մոտ ընկերուհին էլ պատմել է հետեւյալը. ծեծը սկսվել է այս տարվա մարտից, երբ «Յանիսը Զարուհուց փող է ուզել, հետո էլ պարբերաբար վռնդել է տնից»: Աղջկա մահվան նախորդ օրն էլ ամուսինը ՙծեծել-լարել էր՚ էր նրան. աղջիկը 3-4 օր ապրում էր ընկերուհիներից մեկի տանը: Ընկերուհու վկայությամբ` այդ ժամանակ արդեն նրա մատը ջարդված, բայց անգամ փաթաթված չէր, դեմքը «մի կողմից փուչիկի պես ուռած եւ կապտած էր» ծեծից: Հարեւանները Զարուհի Պետրոսյանի բարոյականության մասին այսպես են արտահայտվել. «Ընտիր, հեզ, խոնարհ, բռիլիանտե աղջիկ» էր` ի տարբերություն իր ամուսնու, որը, աղջկա մոտ ընկերուհու խոսքերով, «ման եկող էր»: Զարուհի Պետրոսյանի իրավահաջորդ ճանաչված Հասմիկ Պետրոսյանը պատրաստվում է խնամակալության վերցնել քրոջ դստերը:
