ԱՄՆ նախկին նախագահ Ջորջ Բուշ կրտսերը հրաժարվել է մասնակցել Հանրապետական կուսակցության նախընտրական համագումարին, քանի որ ցանկանում է հեռու մնալ հրապարակային քաղաքականությունից: Այս մասին, ինչպես հաղորդում է RIA Novosti-ն, հայտնել է նախկին նախագահի ներկայացուցիչ Ռեդի Ֆորդը:
Ավելի վաղ հայտնի էր դարձել, որ օգոստոսի 27-30-ին կայանալիք համագումարին, որում պետք է որոշվի Հանրապետական կուսակցության միասնական թեկնածուն, ներկա չի լինի ևս մեկ նախկին նախագահ՝ Ջորջ Բուշ Ավագը: Վերջինիս հրաժարվելու պատճառը առողջական լուրջ խնդիրներն են. նա տառապում է հոդային հիվանդությամբ և տեղաշարժվում է միայն անդամալույծի սայլակով:
«Նախագահ Բուշը (կրտսերը) շնորհակալ է համագումարի հրավերի համար: Նա աջակցում է Միթ Ռոմնիին և հաջողություն մաղթում նրան: Նախագահ Բուշը համոզված է, որ Ռոմնին հիանալի նախագահ կդառնա: Միաժամանակ, նա գոհ է, որ քաղաքական թատերաբեմից դուրս է և երախտագիտությամբ հրաժարվում է այցելել Տամպա»,- ասվում է Ֆորդի հայտարարության մեջ:
Այս պահին դե ֆակտո Հանրապետական կուսակցության միասնական թեկնածուն Մասաչուսեթսի նախկին նահանգապետ Միթ Ռոմնին է: Փոխնախագահի թեկնածուն առայժմ հայտարարված չէ, Ռոմնին պատրաստվում է այդ մասին հայտարարել առաջիկա օրերին:
Համագումարին Բուշերի ընտանիքը կներկայացնի 43-ամյա նախագահի եղբայրը՝ Ֆլորիդայի նախկին նահանգապետ Ջեբ Բուշը:
Բուշ Կրտսերը խուսափում է ԶԼՄ-ների ուշադրությունից և գործնականում չի մասնակցում երկրի քաղաքական կյանքին այն բանից հետո, երբ 2009թ. հունվարին լքեց Սպիտակ տունը: Նա հայտարարություններ չի անում գործող նախագահի քաղաքականության վերաբերյալ, իսկ Ռոմնիին իր աջակցությունը հայտնել է ընդամենը 4 բառով:
