«ՀԺ»-ն գրում է, որ շուտով կլրանա մեկ տարին, ինչ Երևանի քաղաքապետարանը մնացել է առանց քաղաքապետի առաջին տեղակալի:
2011 թվականի նոյեմբերի 15-ից, այսինքն՝ այն օրից, երբ Տարոն Մարգարյանը դարձավ Երևանի քաղաքապետ, մայրաքաղաքը մնաց առանց քաղաքապետի առաջին տեղակալի: Երևանի ավագանու կազմավորման պահից մինչև նշված օրը Երևանի քաղաքապետի առաջին տեղակալի պաշտոնը զբաղեցնում էր Տարոն Մարգարյանը: Երևանի քաղաքապետի առաջին տեղակալի դերակատարությունը մայրաքաղաքի կառավարման գործընթացում առանձնահատուկ է: Քաղաքապետի առաջին տեղակալը միակ փոխքաղաքապետն է, որին «Երևան քաղաքում տեղական ինքնակառավարման մասին» ՀՀ օրենքով իրավունք է տրվում քաղաքապետի բացակայության ժամանակ փոխարինել նրան:
Այսինքն, առանց առաջին տեղակալի՝ Երևանի քաղաքապետն իրավունք չունի բացակայելու, ասենք՝ մեկնելու արտերկիր գործուղման կամ արձակուրդ գնալ, քանի որ մայրաքաղաքն այդ դեպքում կմնա առանց կառավարման: Բանն այն է, որ «Երևան քաղաքում տեղական ինքնակառավարման մասին» ՀՀ օրենքի համաձայն՝ Երևանում տեղական ինքնակառավարման մարմինը քաղաքապետն է: Այսինքն, առանց քաղաքապետի կամ նրան փոխարինող առաջին տեղակալի, Երևանը կմնա առանց տեղական ինքնակառավարման մարմնի:
Քաղաքապետի առաջին տեղակալը պետք է լինի Երևանի ավագանու անդամ: Նրան նշանակում է ավագանին՝ քաղաքապետի առաջարկությամբ: Երևանի քաղաքապետարանի տեղեկատվության և հասարակայնության հետ կապերի վարչության պետ Արթուր Գևորգյանը մեզ հետ զրույցում ասաց, որ եկող շաբաթվա ընթացքում միայն կկարողանա պատասխանել, թե ինչու Տարոն Մարգարյանն առաջին տեղակալի թեկնածու չի ներկայացնում Երևանի ավագանուն: Սակայն, ստեղծված իրավիճակն ինքնին շատ պարզ Է. Տարոն Մարգարյանը առաջին տեղակալի թեկնածություն չի առաջադրում, որովհետև Երեւանի ավագանու ՀՀԿ խմբակցության 35 հոգանոց կազմում համապատասխան թեկնածու չկա: Երևանի ավագանու ՀՀԿ խմբակցության կազմում ի սկզբանե չորս հոգի է եղել, որոնք քիչ թե շատ ունակ էին և նրանց իրավունք կտրվեր քաղաքապետ կամ քաղաքապետի տեղակալ դառնալ՝ Գագիկ Բեգլարյան, Կարեն Կարապետյան, Դերենիկ Դումանյան և Տարոն Մարգարյան: Վերջինս այժմ մնացել է միայնակ»:
