ԼՂՀ-ում հուլիսի 19-ին կայացած նախագահական ընտրություները, վստահաբար, իսկական ջրբաժան էին հին ու նոր Ղարաբաղների միջև: «Առաջին լրատվական»-ի հետ զրույցում այս մասին ասաց ԼՂՀ նախագահի նախկին թեկնածու Վիտալի Բալասանյանի նախընտրական շտաբի անդամ, «Արցախի Եվրոպական շարժում» ՀԿ նախագահ Հայկ Խանումյանը:
«Վերջին 5 տարիներին ԼՂՀ քաղաքական կյանքը խիստ պասսիվ է եղել, երկրում որևէ ժողովրդավարական գործընթաց չի իրականացվել: Նախորդ Արցախում տեղի ունեցած նախագահական ընտրությունները ցույց էին տվել, որ Ղարաբաղում ընդդիմադիր ուժ չկա, բայց այս ընտրությունները փաստեցին, որ Արցախի բնակչության առնվազն 1/3-ն ընդդիմադիր է գործող իշխանություններին: Հետևաբար, 2012-ին կայացած նախագահական ընտրությունները, իսկապես, ջրբաժան են նախկին ու ներկա Ղարաբաղների միջև»,- ասաց նա:
Խանումյանի խոսքով՝ վերջին տարիներին Արցախում այնպիսի քաղաքական ռեժիմ էր ստեղծվել, որը քաղաքացիներին զրկել էր ազատ կամարտահայտման հանրավորությունից: «Փաստորեն, նախագահական ընտրություններն արցախցիների համար նաև բողոքի արտահայտման ձև էին»,- ամփոփեց նա:
Հիշեցնենք՝ ԼՂՀ-ում նախագահական ընտրությունները տեղի են ունեցել հուլիսի 19-ին: Դրանցում հաղթել է Բակո Սահակյանը:
