Աշխարհի մուսուլմանական հատվածն այսօր նշում է Մուհամեդ մարգարեի ծննդյան օրը` Մաուլիդ Ալ-Նաբի` մարգարեի ծնունդ: Ըստ լուսնային օրացույցի` նա ծնվել է ռաբի ալ-աուալ ամսվա 12-րդ օրը, որը համընկնում է գրիգորյան օրացույցի փետրվարի 15-ի հետ: Մուսուլմաններն արդեն սկսել են նշել այս տոնը փետրվարի 14-ի ճրագալույցին: Աշխարհի շատ մուսուլմանական երկրներում այս օրը հանգստյան է, իսկ Պակիստանում այն նշվում է երեք օր շարունակ:
Գիտնականները միակարծիք չեն, թե երբ է ծնվել Մուհամեդ մարգարեն (570-580թթ.): Սակայն այս տոնը նշվում է նրա մահվան օրը: Բանն այն է, որ իսլամական ավանդությամբ` մահը դիտվում է որպես հավերժական կյանքի ծնունդ: Այդ իսկ պատճառով մուսուլմաններն իրենց ծննդյան օրը կա՛մ շատ համեստ են նշում, կա՛մ ընդհանրապես չեն նշում:
Այսօր մուսուլմանները կարդում են աղոթքներ, լսում են Մուհամեդ մարգարեի կյանքի հետ կապված պատմություններ: Այս տոնը հատկապես սիրում են երեխաները, քանի որ նրանց հաճախ քաղցրավենիքներ են նվիրում, իսկ բակերն ու փողոցները գեղեցիկ զարդարվում են:
