«Առաջին լրատվական»-ի զրուցակիցն է «Սարդարապատ» նախաձեռնության անդամ Ժիրայր Սեֆիլյանը:
-Պարո´ն Սեֆիլյան, ի՞նչ անհրաժեշտ քայլեր պետք է անի ՀՀ-ն, որպեսզի սիրիահայերը գան Հայաստան:
-Հայության խնդիրների ամբողջական և ժամանակին լուծումը պայմանավորված է առաջին հերթին մեկ գործոնով` հայկական պետության առկայությամբ: Բացառություն չէ նաև ներգաղթի կազմակերպման խնդիրը: Ներգաղթի օգնությամբ հնարավոր է ոչ միայն մասամբ մեղմել ՀՀ-ում առկա ժողովրդագրական խնդիրը, այլև ուծացումից փրկել Մեծ Մերձավոր Արևելքի, ի մասնավորի ֆիզիկական գոյությանը սպառնացող Սիրիայի հայությանը:
Ցավով պետք է արձանագրել, որ Հայաստանի Հանրապետությունը կայացած պետություն չէ: Այն ի վիճակի չէ իրականացնելու ինքնուրույն արտաքին և ներքին քաղաքականություն և, փաստորեն, չունի իրական միջազգային-իրավաքաղաքական սուբյեկտություն, ուստիև ի վիճակի չէ որևէ շոշափելի քայլ իրականացնելու սիրիահայությանը վերահաս աղետից փրկելու և իր հայրենիքում բնակեցնելու ուղղությամբ:
-Ո՞ր ոլորտներում են ամենաշատ անելիքները, մարդկանց համար ի՞նչ կենսապայմաններ առաջին հերթին պետք է ստեղծել:
-Կայացած հայկական պետությունը պետք է իր առանցքի շուրջ համայն հայության համախմբմամբ վարեր ինքնուրույն Հայաստանակենտրոն քաղաքականություն, ինչը հնարավորություն կտար Հայաստանը և հայությանը վերածելու աշխարհաքաղաքական գործոնի և որպես սուբյեկտ մասնակցելով միջազգային քաղաքական գործընթացներին` իր շահերին համապատասխան հասնելու առաջադրված ազգային նպատակների ու խնդիրների իրագործմանը:
Ներկայիս Հայաստանի Հանրապետությունը կառավարում է քրեաօլիգարխիկ` անձնական և կլանային շահերով առաջնորդվող վարչախումբը, որն իզորու չէ ինքնուրույն որևէ հայանպաստ գործողություն իրականացնելու, այդ թվում նաև բավարար կենսապայմաններ ապահովելու ՀՀ ներգաղթողների համար: Ավելին, այն նույնիսկ ի վիճակի չէ սահմանելու անհրաժեշտ անելիքներն ու առկա խնդիրները:
-Ըստ Ձեզ` սիրիահայերի բնակեցման համար ո՞ր տարածքներն են հարմար։ Օրինակ` ջավախահայերը դիմել են Վրաստանի նախագահին, որ թույլ տա սիրիահայերին բնակվելու Ջավախքում։Սա նորմա՞լ եք համարում։ Թե՞ Ջավախքում ջավախահայը պիտի բնակվի:
– Արտերկրում բնակվող և այլ երկրի քաղաքացի հանդիսացող ցանկացած հայ, մասնավորապես Սիրիայում բնակվող հայն իրավունք ունի վերաբնակվելու իր հայրենիքի ցանկացած մասում, և պետության սուրբ պարտականությունն է ապահովել այդ ցանկության իրականացումը:
Սակայն հայությունն այսօր ունի ներուժ` օժտված կազմակերպական, մարդկային և ֆինանսական ռեսուրսներով` անհրաժեշտ պահին իրականացնելու սիրիահայության ներգաղթն իր հայրենիք: Այս թեմայի վերաբերյալ «Սարդարապատ» շարժման նախաձեռնող խումբը առաջիկա օրերին մամուլի ասուլիս է հրավիրելու, որտեղ մանրամասն անդրադարձ կկատարվի քննարկվող խնդիրներին:
