ԱՄՆ-ը կշարունակի տարբեր ճանապարհներով Սիրիայում հասնել իշխանափոխության: Այս մասին, ինչպես հաղորդում է Interfax-ը, հայտարարել է ԱՄՆ պետքարտուղարության պաշտոնական ներկայացուցիչ Պատրիկ Վենտրելը:
Նա նշել է, որ ՄԱԿ-ի Անվտանգության խորհրդում երեկ կայացած քվեարկությունը, որի ժամանակ Ռուսաստանը և Չինաստանը վետո դրեցին Սիրիայի հարցով բանաձևի վրա, «արժանի է ափսոսանքի» և «ողբալի է»:
«Մենք շատ լուրջ ենք ծրագրում մեր հաջորդ քայլերը, քանի որ Ասադը չպետք է մնա իշխանության գլուխ, ու պետք է իրականացվի կառավարության փոփոխություն: Եվ մենք ակտիվորեն աշխատում ենք, որպեսզի վստահ լինենք, որ պատրաստ ենք բոլոր պոտենցիալ սցենարներին: Ընդդիմությունը ծրագիր ունի և տեսություն, թե ինչ պետք է իրենից ներկայացնի նոր կառավարությունը: Մենք կշարունակենք աջակցել նրան, քանի որ, եթե Ասադը տապալվի, մենք կցանկանայինք, որ իշխանության փոխանցման ծրագիր արդեն լինի, որպեսզի մենք կարողանանք առաջ շարժվել դեպի նոր Սիրիա»,- ասել է դիվանագետը:
Վենտրելի խոսքերով՝ «մշտական ներկայացուցիչ Սյուզան Ռայսը քվեարկությունից հետո շատ հստակ ասել է, որ մենք պատրաստվում ենք ուղիներ փնտրել ՄԱԿ-ի Անվտանգության խորհրդից դուրս»:
Հիշեցնենք. երեկ ՄԱԿ-ի Անվտանգության խորհդում քննարկման էր դրված 2 բանաձև՝ ռուսական և արևմտյան: Ռուսաստանը և Չինաստանը դեմ քվեարկեցին արևմտյան բանաձևին, իսկ ավելի ուշ հայտնի դարձավ, որ Ռուսաստանը քվեարկությունից հանել է բանաձևի իր նախագիծը:
