Երևանի Կենտրոն և Նորք-Մարաշ վարչական շրջանների ընդհանուր իրավասության դատարանում այս պահին շարունակվում է ՀԱԿ ակտիվիստներ Տիգրան Առաքելյանի, Արտակ Կարապետյանի, Սարգիս Գևորգյանի և Դավիթ Քիրամիջյանի գործով դատավարությունը: Այս պահին պաշտպանական ճառն է հրապարակում ամբաստանյալներից Տիգրան Առաքելյանի պաշտպան Ստեփան Ոսկանյանը:
Հիշեցնենք, որ անցած տարվա օգոստոսի 9-ին Խնկո-Ապոր գրադարանի մոտ տեղի ունեցած միջադեպի հետ կապված` ոստիկանության Կենտրոնի բաժին բերման էին ենթարկվել Հայ ազգային կոնգրեսի 7 ակտիվիստներ, ավելի ուշ երիտասարդներից 4-ի մասով գործն ավարտվել էր և ուղարկվել դատարան, մյուս երեք երիտասարդների մասով գործը դեռևս գտնվում է ՀՔԾ-ում: Վեց երիտասարդները ստորագրությամբ ազատ էին արձակվել, իսկ Տիգրան Առաքելյանը մինչ այժմ կալանավորված է:
Ըստ ոստիկանության` գրադարանի մոտ միջադեպը սկսվել էր այն բանից, երբ ոստիկանները մի երիտասարդի հորդորել էին շանը ման տալ դնչկալով, մինչդեռ երիտասարդների պնդմամբ` միջադեպը սկսվել էր ոստիկանների սադրիչ գործողությունների հետևանքով:
Պաշտպան Ստեփան Ոսկանյանը քիչ առաջ իր պաշտպանական ճառում ընդգծեց, որ շան վարկածն իրականում ոստիկանության կողմից հորինված է ոստիկանության ապօրինի գործողությունները կոծկելու համար, որովհետև կատարվել էր ապօրինի հետախուզում, իսկ շան վարկածի վրա, պաշտպանի համոզմամբ, հետագայում կազմվել է մեղադրական ճառ:
Ստեփան Ոսկանյանը համոզմունք հայտնեց, որ այդ օրը որևէ միջադեպ տեղի չէր ունենա, եթե ոստիկանությունը չսահմանափակեր իր պաշտպանյալների իրավունքները, այդ թվում՝ ազատ տեղաշարժվելու իրավունքը:
Հիշեցնենք, որ մեղադրող դատախազը միջնորդել է Արտակ Կարապետյանին ազատազրկման դատապարտել 3 տարի 5 ամիս 15 օր ժամկետով` միաժամանակ վերջինիս համար առաջ քաշելով մեղմացնող հանգամանք ՝ անչափահաս երեխա ունենալը: Սարգիս Գևորգյանին առաջարկել է դատապարտել 1 տարի 10 ամիս 20 օր ժամկետով, Դավիթ Քիրամիջյանին` 2 տարի ժամկետով, իսկ Տիգրան Առաքելյանին` 6 տարի ժամկետով:
