Թուրքական Bugün թերթին տված հարցազրույցի ժամանակ Թուրքիայի ներքին գործերի նախարար Իդրիս Նաիմ Շահինը հայտարարել է, որ Թուրքիան «աշխարհի ամենաանվտանգ երկիրն» է.
«Երկրում շարունակվում է հանցավորության դեմ պայքարը: Եվրոպական երկրներում յուրաքանչյուր 100,000 բնակչին բաժին է ընկնում 5-10,000 հանցագործ: Մինչդեռ Թուրքիայում այդ ցուցանիշը կազմում է մոտ 1350: Մենք իրականացնում ենք մի շարք սոցիալական նախագծեր՝ կանխելու համար անձնական ունեցվածքի դեմ հանցագործությունները: Ցայժմ մենք իրագործել ենք նմանատիպ 1750 նախագիծ: Հանցագործության կանխումը պահանջում է շատ ավելի փոքր ծախսեր, քան՝ դրա հետաքննումն ու բացահայտումը»:
Հիշեցնենք, որ նախորդ տարի ամերիկյան Associated Press գործակալությունը սեպտեմբերի 11-ին ընդառաջ հետազոտություն է անցկացրել աշխարհի 66 երկրներում, որոնց բաժին է ընկնում աշխարհի բնակչության 70 տոկոսը՝ պարզելու ահաբեկիչների քանակն աշխարհում ընդհանրապես և տարբեր երկրներում առանձին վերցրած։
Ըստ դրա՝ 2001 թվականի սեպտեմբերի 11-ի ահաբեկչությունից հետո համայն աշխարհում ձերբակալվել էր 119,044 ահաբեկիչ, իսկ 35,117 մարդ դատապարտվել էր որպես ահաբեկիչ։ Այդ թվի 1/3-ը՝ 12,897 մարդ, բաժին էր ընկել Թուրքիային (Երկրորդ տեղում Չինաստանն է՝ 7000 ահաբեկիչ)։ Վերջին 10 ամսում դատապարտված ահաբեկիչների թվով Թուրքիան աշխարհի բացարձակ առաջատարն է։
Ամերիկյան լրատվական գործակալությունն ընդգծել էր, որ Թուրքիայում որպես ահաբեկիչ դատապարտված անձանց հարցում կարծիքները կիսվում են. մի մասը նրանց (քրդերին) դիտարկում է որպես ահաբեկիչներ, իսկ մյուսները՝ ազատության համար պայքարի մարտիկներ։
