Քիչ առաջ կառավարության շենքում վատացավ 2007 թվականին բանակում մահացած Տիգրան Օհանջանյանի մոր ինքնազգացողությունը, ինչի պատճառով բոլոր ծնողները դուրս եկան կառավարության շենքից:
Զոհված զինծառայող Վալերի Մուրադյանի մոր` Նանա Մուրադյանի խոսքով` իրենք պահանջում էին վարչապետի հետ հանդիպում, սակայն չլսելով իրենց խնդիրները` իրենց ամեն օր սպանում են: Նա նշեց, որ հաջորդ հինգշաբթի հաշվի չառնելով ոչ ոքի` բարձրանալու և հանդիպելու են վարչապետի հետ:
«Առաջին լրատվական»-ի հետ զրույցում Արտակ Նազարյանի մայրը` Հասմիկ Հովհաննիսյանը, նշեց, որ կառավարության շենք մտնելը պարզապես բողոքի արտահայտման ձև է: Ըստ նրա` իրենք թքում-մրում են, սակայն ուշադրություն դարձնող չկա:
Հասմիկ Հովհաննիսյանի խոսքով` իրենց որդիների գործում ներգրավված դատավորները ամեն ինչ անում են գործերը կոծկելու և հանցագործներին չբացահայտելու համար: Դատավորները իրենց պահում են պարզապես բռնապետի նման:
«Չեն բացահայտում հանցագործությունները, որովհետև դրանցից շահ ունեն, իսկ մեր ուզածը երկրում կարգին բանակն է: Մենք գիտակցում ենք, որ մեր տղաներին ոչ ոք ետ չի բերի և տա մեր ձեռքը»,- ասաց Հասմիկ Հովհաննիսյանը` հավելելով, որ իշխանություններին ձեռք է տալիս հանցագործ բանակ ունենալը:
Հիշեցնենք, որ այսօր որդեկորույս մայրերը կարողացան մուտք գործել կառավարության շենք և ընդունարանում պահանջել վարչապետի հետ հանդիպում:
Լուսանկարը՝ PanARMENIAN Photo-ի
