ՀՀ տրանսպորտի և կապի նախարարությունը դիմել էր կառավարությանը՝ խնդրելով «Բարեգործության մասին» օրենքի պարզաբանում, որը ստացվել է, բայց դեռ պաշտոնապես չի հրապարակվում, քանի որ այն ուսումնասիրությունների բաղկացուցիչ մասն է կազմում, իսկ ուսումնասիրությունը դեռ շարունակվում է:
Այս մասին «Առաջին լրատվական»-ի հետ զրույցում հայտնեց ՀՀ տրանսպորտի և կապի նախարարության Տրանսպորտի վարչության պետ Դավիթ Մելքոնյանը՝ պարզաբանելով տարածված լուրերը, որ «Քինգ դե լյուքս» ընկերության ներկայացրած բողոքի արդյուքնում կառավարությունը «Ծառուկյան» բարեգործական հիմնարկի անվճար երթուղին անօրինական է ճանաչել:
«Ուսումնասիրությունների ավարտից հետո անպայման հայտարարություն կլինի»,- խոստացավ Դ.Մելքոնյանը՝ նշելով, որ պարզ չէ, թե ինչքան կտևի, բայց աշխատում են արագ ավարտել:
Առաջիկա ուրբաթ օրը նախատեսվող գործադուլի մասին Դ.Մելքոնյանը մամուլից է տեղեկացել. «Մենք տեղյակ չենք, համենայն դեպս, ամեն ինչ կանենք, որ գործադուլ չլինի»:
