Վաղը՝ առավոտյան 2008թ. մարտի 1-ի զոհ Տիգրան Խաչատրյանի մայրը նամակով հարցումներ կուղարկի ՀՔԾ: Այս մասին «Առաջին լրատվական»-ի հետ զրույցում հայտնեց Ալլա Հովհաննիսյանը:
Ըստ նրա` նամակի միտքը հղացել է, երբ կարդացել է ՀՔԾ վեց ամսվա հաշվետվությունը, որտեղ ոչինչ չի եղել մարտիմեկյան դեպքերի մասին: Նրա խոսքով` բավական ժամանակ է, ինչ Վաղինակ Ջանազյանը փոխարինում է Վահագն Հարությունյանին: «Այս ընթացքում մենք իրար հետ ընդհանրապես չենք հանդիպել, նա նաև ասել էր, որ հանրային հետաքրքրություն չկա, այդ պատճառով չեն տեղեկացնում, թե ինչ աշխատանքներ են իրականացրել: Բավական երկար ժամանակ է անցել, կարծում եմ, որ նյութերին արդեն ավելի լավ է ծանոթ, պետք է պատասխան տա, թե այս վեց ամիսների ընթացքում ինչ աշխատանքներ է իրականացրել, կոնկրետ ես իմ տղայի վերաբերյալ մի քանի հարցադրում ունեմ և ընդհանրապես ուզում եմ իմանալ` որևէ բան արվե՞լ է, թե՞ ոչ: Թող մեզ հրավիրեն, ցույց տան, թե ինչ աշխատանքներ են իրականացրել»,- մանրամասնեց Ալլա Հովհաննիսյանը:
Նրա կարծիքով` մարտիմեկյան դեպքերի բացահայտումը հանրային հետաքրքրություն չի ներկայացնում պնդումը ճիշտ չէ: «Այն մարդիկ, ովքեր այսօր «Հարսնաքարի» գործով են պայքարում, միշտ եղել են մեր կողքին, ինչպես Գասպարին, ամեն միջոցառմանը եղել են: Կան որոշ կազմակերպություններ և անհատներ, որոնք միշտ վախենում են Մարտի 1-ից, որովհետև նրանք ուղղորդված են և կողմ են անշառ միջոցառումներին մասնակցելուն, այս նույն հանրային սեկտորի մեջ կան մարդիկ, որոնք միշտ մեր կողքին են եղել, և կան մարդիկ, որոնք երբեք էլ չեն եղել և վախեցել են` գտնելով, որ սա քաղաքական է»,- մեկնաբանեց Ալլա Հովհաննիսյանը` հավելելով, որ մարտիմեկյան իրադարձություններն իր համար միշտ մնում են օրակարգում, թեև այն ցանկանում են շահարկել:
Ալլա Հովհաննիսյանն այն կարծիքին է, որ Մարտի 1-ի զոհերի ծնողների մեղքն է, որ վերջին շրջանում չեն բարձրաձայնել այս հարցը:
