«Մեր կողմից բազմիցս հայտարարվել է, որ այն հիմքի վրա, որի շուրջ համանախագահները փորձում են առաջ տանել բանակցային գործընթացը, հնարավոր չէ հասնել հաջողության, մասնավորապես խոսքը վերաբերում է Մադրիդյան սկզբունքներին: Մեր համոզմամբ, եթե այդ սկզբունքները ընդունվեն և իրագործվեն, ապա դա ավելի շուտ կհանգեցնի պատերազմի, ոչ թե խաղաղության»,- անդրադառնալով ՄԽ համանախագահների վերջին այցելությանը տարածաշրջան` «Առաջին լրատվականի» հետ զրույցում կարծիք հայտնեց ԼՂՀ նախկին փոխարտգործնախարար Մասիս Մայիլյանը:
Մայիլյանի խոսքերով, թեև համանախագահների վերջին հայտարարության մեջ կոչ կա, որպեսզի կողմերը հանդուրժողականություն դրսևորեն, հասնեն խաղաղության, բայց հարց է առաջանում, թե ի՞նչ կերպ պիտի դա արվի և ի՞նչ մեթոդներ պետք է գործադրվեն դա իրականացնելու համար:
Մայիլյանը կարևորեց համանախագահների հայտարարության այն մասը, որտեղ վերջիններս կողմերին հորդորում են ցուցաբերել զսպվածություն իրենց գործողություններում և հայտարարություններում. «Իրոք, կողմերը պետք է ամեն ինչ անեն, որպեսզի լարվածությունը տարածաշրջանում թուլանա, և միայն այդ պայմաններում է հնարավոր առաջընթաց ապահովել բանակցային գործընթացում»:
ԼՂ նախկին փոխարտգործնախարարը ցավ հայտնեց, որ համանախագահները այս անգամ ևս չայցելեցին Ստեփանակերտ, ինչը ևս վկայում է այն մասին, որ սա իրոք հերթական այցելություն էր և ոչ մի ուրիշ ակնկալիք պետք չէր ունենալ դրանից. «Քանի որ հիմքը սխալ է դրված, որևէ առաջընթաց չի կարող արձանագրվել»:
