Թուրքական Dünya Bülteni կայքի փոխանցմամբ՝ սեպտեմբերի 30-ին տեղի է ունենալու իշխող «Արդարություն և զարգացում» կուսակցության (ԱԶԿ) մեծ կոնգրեսը, որում տեղի են ունենալու մեծ փոփոխություններ:
Խոսքն ԱԶԿ-ի ներքին կանոնադրության մասին է, ըստ որի՝ անընդմեջ 3 ժամանակաշրջան նախարար կամ պատգամավոր հանդիսացած ԱԶԿ-ական գործիչներն այլևս չեն կարող առաջադրել իրենց թեկնածությունները համապատասխան պաշտոններում: Ներկայումս նախատեսվում է, որ ԱԶԿ-ի այդ նիստում մեղմացվելու է «3 ժամանակաշրջանի արգելքը»:
Այժմ նախատեսվում է, որ նոր փոփոխություններով 3 ժամանակաշրջան նախարար կամ պատգամավոր հանդիսացածներին թույլատրվելու է իրենց թեկնածությունը դնել 2014 թվականի մարտին կայանալիք տեղական ինքնակառավարման մարմինների (ՏԻՄ) ընտրություններում: Խոսքն Իզմիրի, Ստամբուլի, Անկարայի նման մեծ քաղաքների քաղաքապետերի պաշտոնների համար պայքարելու մասին է:
Հիշեցնենք, որ Թուրքիայի վարչապետ ու ԱԶԿ նախագահ Էրդողանը սեպտեմբերի 30-ին չորրորդ և վերջին անգամ առաջադրելու է իր թեկնածությունը ԱԶԿ նախագահի պաշտոնում: Ներկայումս Էրդողանը մտադիր է ՏԻՄ ընտրություններն անցկացնել 2013 թվականի աշնանը՝ դա պատճառաբանելով նրանով, որ 2014 թվականի օգոստոսին Թուրքիայում անցկացվելու են նախագահական ընտրություններ, և նպատակահարմար չէ մեկ տարում անցկացնել երկու ընտրություններ:
Ավելին, Էրդողանը հրահանգել է ՏԻՄ ընտրություններում ամեն գնով հաղթանակ տանել քրդաբնակ Դիարբեքիրի, Վանի և Մարդինի նահանգներում: ԱԶԿ-ի պլանի համաձայն` Թուրքիայի՝ Եվրամիության հարցերով պետնախարար Էգեմեն Բաղըշը կարող է դառնալ Ստամբուլի, փոխվարչապետ Ալի Բաբաջանը` Անկարայի, Տրանսպորտի նախարար Բինալի Յըլդըրըմը` Իզմիրի, Էներգետիկայի նախարար Թաներ Յըլդըզը` Քայսերիի, Սպորտի նախարար Սուաթ Քըլըչը` Սամսունի, Ընտանեկան նախարար Ֆաթմա Շահինը` Գազիանթեփի քաղաքապետ:
Բացի այդ, ներկայումս Թուրքիայի կառավարությունը պատրաստել է նոր նախագիծ, որով նախատեսվում է մեծ քաղաքների համար անցում կատարել ղեկավարման մի նոր մոդելի: Դրա համաձայն` ներկայիս 16 մեծ քաղաքներին գումարվելու են 13 նորաստեղծ մեծ քաղաքներ (Մուղլա, Հաթայ, Մանիսա, Դենիզլի, Շանլըուրֆա, Բալըքեսիր, Քահրամանմարաշ, Վան, Այդըն, Թեքիրդաղ, Մարդին, Մալաթիա, Տրապիզոն), որով և դրանց թիվը կազմելու է 29: Մեծ քաղաքների սահմանները հավասարեցվելու են նահանգների սահմաններին, իսկ նահանգի քաղաքները «վերածվելու» են մեծ քաղաքի թաղամասերի: Այդ մեծ քաղաքներում էլ կիրառվելու է ղեկավարման «սուպեր համակարգ», որը ղեկավարելու են «սուպեր նախագահները»:
