ՀՀ փոխվարչապետ, տարածքային կառավարման նախարար Արմեն Գևորգյանն այսօր ընդունել է Ասիական զարգացման բանկի պատվիրակությանը` փոխնախագահ Քսիաոու Ժաոյի գլխավորությամբ: Հանդիպմանը ներկա են եղել նաև ՀՀ էկոնոմիկայի նախարար Տիգրան Դավթյանը, Հյուսիս-հարավ ճանապարհային միջանցքի ներդրումային ծրագրի իրականացման գրասենյակի գործադիր տնօրեն Արա Հովսեփյանը:
Փոխվարչապետը ողջունելով հյուրերին` նշել է, որ 2005թ-ին` ԱԶԲ-ին Հայաստանի անդամակցությունից հետո` այս կարճ ժամանակահատվածում, բանկը հասցրել է դառնալ Հայաստանի ամենախոշոր դոնորներից մեկը: Բանկի հետ Հայաստանը համագործակցում է մեր երկրի զարգացման համար էական նշանակություն ունեցող ոլորտներում: Կարևորելով բանկի հետ իրականացվող ծրագրերը` փոխվարչապետը, մասնավորապես, անդրադարձ է կատարել ենթակառուցվածքների զարգացմանն ուղղված Հյուսիս-հարավ ավտոճանապարհի կառուցման խոշոր ծրագրին, ինչպես նաև ջրամատակարարման և քաղաքային կայուն զարգացման ծրագրերին:
Ա. Գևորգյանը շնորհակալություն է հայտնել փոխնախագահին արդյունավետ համագործակցության համար` ընդգծելով բանկի կառուցողական և բաց դիրքորոշումը ենթակառուցվածքային տարբեր ծրագրերի քննարկման ժամանակ:
Փոխվարչապետը նշել է, որ հաշվի առնելով Հյուսիս-հարավ ավտոմայրուղու կառուցման ծրագրի` գործնական փուլին անցումը, նպատակահարմար է ԱԶԲ-ի կողմից ծրագրի իրականացման մասով առավել ներգրավվածություն` մասնավորապես` որոշումներ կայացնելու առավել արագ մեխանիզմների կիրառում:
ՏԿՆ հասարակայնության հետ կապերի բաժնից «Առաջին լրատվական»-ին հայտնում են, որ հանդիպմանը Ա. Գևորգյանը կարևորել է նաև առաջիկայում բանկի հետ իրականացվող ծրագրերի արդյունքում ձևավորվող ենթակառուցվածքների համար համատեղ ռազմավարական և ինստիտուցիոնալ բարեփոխումների ծրագրերի մշակումը, տեխնիկական և կառավարչական կարողությունների զարգացումը:
ԱԶԲ-ի փոխնախագահ Քսիաոու Ժաոն վստահություն է հայտնել, որ ՀՀ նոր կառավարությունը հստակ պատկերացում և կարողություններ ունի`իրականացնելու երկրի զարգացման համար անհրաժեշտ ծրագրեր , և հայտնել ԱԶԲ-ի պատրաստակամությունը` աջակցել ՀՀ-ի համար կարևոր նշանակության ծրագրերի իրականացմանը և նոր ծրագրերի քննարկմանը: Մասնավորապես` նշվել է արդյունաբերությունում և գյուղատնտեսությունում առկա ներուժի մասին: ԱԶԲ փոխնախագահը կարևորել է Հայաստանում ընթացող հարկային վարչարարության բարեփոխումների իրականացումը, ինչն առավել նպաստավոր բիզնես միջավայրի ձևավորման կհանգեցնի:
Հանդիպման ընթացքում քննարկվել է նաև Հյուսիս-հարավ ճանապարհային միջանցքի ներդրումային ծրագրի` Տրանշ-3-ի նախապատրաստման աշխատանքներն արագացնելու հարցը: Պայմանավորվածություն է ձեռք բերվել` ՀՀ-ի և բանկի միջև արագացնել ընթացակարգային գործընթացները:
Անդրադարձ է կատարվել նաև Հարավարևելյան Ասիայի տարածաշրջանի այլ դոնոր կազմակերպությունների հետ համագործակցության, ընդլայնման հնարավորություններին:
