Ադրբեջանական APA լրատվական գործակալությանը տված հարցազրույցի ժամանակ Ադրբեջանի արտգործնախարար Էլմար Մամեդյարովն անդրադարձել է Ղարաբաղյան հակամարտության կարգավորմանը.
«Ադրբեջանի դիվանագիտության առջև ծառացած գլխավոր ու առաջնահերթ հարցը Ղարաբաղյան հակամարտության կարգավորումն է: Երկրի ղեկավարության ջանքերը կենտրոնացած են տվյալ ուղղությամբ: Մենք դժգոհ ենք Ղարաբաղյան հակամարտության կարգավորման հարցում ԵԱՀԿ Մինսկի խմբի միջնորդական առաքելության անարդյունավետությունից:
Ստատուս-քվոյի շարունակումը նպաստում է տարածաշրջանում անորոշության, անկանխատեսելիության և վտանգի մթնոլորտին: ԵԱՀԿ Մինսկի խմբում համանախագահող երկրների ղեկավարներն իրենց հայտարարություններում նույնպես նշում են ստատուս-քվոյի պահպանման անընդունելիության մասին:
Նրանք Մադրիդյան նորացված սկզբունքները ներկայացրել են կողմերին: Դրա հետ կապված՝ Ադրբեջանը պատրաստակամություն է հայտնել շարունակել բանակցությունները, այդ թվում նաև աշխատանքներ սկսել բազմակողմ խաղաղության համաձայնագրի կնքման ուղղությամբ:
Դժբախտաբար, այդ առաջարկը մերժվել է Հայաստանի կողմից: Վստահ եմ, որ Ղարաբաղյան հակամարտության կարգավորման հարցում առաջընթացի գրանցման համար Հայաստանը պետք է իր զորքերը դուրս բերի Ղարաբաղից: Միջազգային հանրությունը պետք է Հայաստանին հարկադրի հարգել խաղաղությունը, միջազգային կառույցների որոշումներն ու միջազգային իրավունքը»:
