«Հուլիսի 13-ին Ազգային անվտանգության մարմինների կողմից դպրոցի տնօրենից 40.000 դրամ կաշառք ստանալու պահին ձերբակալվել էր ՀՀ Կոտայքի մարզպետի տեղակալ Լևոն Միքայելյանը: Վերջինս իր պաշտոնավարման ընթացքում մարզի մի շարք միջնակարգ դպրոցների տնօրենների առջև ապօրինի պահանջ էր դրել՝ պարբերաբար կաշառք վճարել դպրոցներում ստուգումներ չիրականացնելու և խնդիրներ չստեղծելու դիմաց»,- գրում է «Ժողովուրդ»-ը և հավելում.
«Կոտայքի մարզպետ Կովալենկո Շահգալդյանին՝ Կովալին, «ժողովուրդ»-ը հարց ուղղեց, թե արդյոք ինքը տեղյակ չէ՞ր, որ իր ենթական նման «գործունեությամբ» է զբաղված, և արդյոք փոխմարզպետը վերցրած կաշառքներն իր հետ չի՞ «կիսել». «Ես ո՞նց կարող էի տեղյակ լինել»: Իսկ մեր դիտարկմանը, թե հնարավոր է՝ փոխմարզպետի աշխատավարձը չի բավարարել, դրա համար է այդ քայլին դիմել, ասաց. «Դրա համար խելոք մարդիկ աշխատավարձին զուգահեռ ունենում են և բիզնես, ապրուստի այլ միջոցներ, և ոչ թե կաշառք, այն էլ 40 հազար դրամ»:
