Ադրբեջանը մտադիր չէ մտնել Մաքսային միության մեջ: Ինչպես հաղորդում է CA-News-ը, այս մասին Եվրասիական տնտեսական հանձնաժողովի մաքսային համագործակցության նախարար Վլադիմիր Գոշինի հետ հանդիպման ժամանակ հայտարարել է Ադրբեջանի Պետական մաքսային համձնաժողովի ղեկավար Այդին Ալիևը: Հանդիպումը կայացել է Մաքսային համագործակցության խորհրդի 119/120 նիստերի և Համաշխարհային ակցիզային գագաթնաժողովի շրջանակներում, որը տեղի է ունեցել Բրյուսելում Համաշխարհային, մաքսային կազմակերպության շտաբ-գրասենյակում:
Հանդիպման ժամանակ ադրբեջանական կողմը հայտարարել է այդ կազմակերպություն չմտնելու իր որոշման և երկրում մաքսային նոր օրենսգրքի ընդունման մասին, նշվում է հաղորդագրության մեջ:
Եվրասիական մաքսային միությունը Բելառուսի, Ղազախստանի և Ռուսաստանի առևտրա-տնտեսական ինտեգրման ձև է, որը նախատեսում է միասնական մաքսային տարածք, որի շրջանակներում փոխադարձ առևտրում մաքսային տուրքեր չեն ընդունվում, և չկան տնտեսկան բնույթի սահմանափակումներ:
Երեք երկրների մաքսային միությունը սկսել է գործել 2012 թվականի հունվարից: Մաքսային միությանը կարող են միանալ Ղրղըզստանը, Մոլդովան և Տաջիկստանը. Այս երկրները հայտարարել են միությանը միանալու հնարավորության մասին:
Ադրբեջանը, ինչպես նաև Ուզբեկստանը և Թուրքմենստանը չի միացել ազատ առևտրի գոտու մասին նոր պայմանագրին, որը ստորագրվել է 2011 թվականի հոկտեմբերի 18-ին:
