Երկու օրում լիովին սպառվել է Nexus 7 պլանշետների առաջին խմբաքանակը: Այս մասին տեղեկացնում է Reuters-ը:
Սարքն ԱՄՆ-ում վաճառքի էր դուրս բերվել ուրբաթ՝ հուլիսի 13-ին, սակայն խանութները սկսել էին սարքի նախնական պատվերներն ընդունել մի քանի օր առաջ: Նշվում է, որ առևտրի կետերի մեծամասնությունում վաճառքի առաջին իսկ օրվա վերջում պլանշետները վերջացած են եղել:
Պլանշետների նոր խմբաքանակը վաճառքի կհանվի օգոստոսի սկզբին: Ամերիկացիները հնարավորություն ունեն Nexus 7 պատվիրել Google-ի միջոցով: Այն մասին, թե քանի պլանշետ է վաճառվել հանգստյան օրերին, չի հաղորդվում:
Google ընկերությունը Nexus 7 պլանշետը ներկայացրել էր հունիսի վերջին: Այն ունի 4 միջուկանի պրոցեսոր և 7 դյույմ անկյունագծով էկրան: Ապարատն աշխատում է Android 4.1 պլատֆորմով և համարվում այդ օպերացիոն համակարգով առաջին սարքը:
Nexus 7-ը համարվում է Google-ի և թայվանական Asustek ընկերության համագործակցության արդյունք:
Գնորդների հետաքրքրության նման ակտիվությունը պայմանավորված է պլանշետների համեստ գներով: 8 գիգաբայթ հիշողությամբ մոդելն արժե 199 դոլար, իսկ 16 գբ հիշողությամբ մոդելը՝ 249 դոլար:
ԱՄՆ-ից բացի՝ սարքը կվաճառվի նաև Ավստրալիայում, Մեծ Բրիտանաիայում և Կանադայում: Հետագայում երկրների ցուցակը կընդլայնվի:
