«Բանդիդոս» բայքերական ակումբը հայտարարել է, որ ցրում է Հենինգսդորֆի իր «Դել Էստե» մասնաճյուղը,- գրում է Tagesspiegel-ը: Հունիսի սկզբին Բեռլինի և Բրանդենբուրգի ոստիկանությունը խոշոր ստուգում էր անցկացրել այդ մասնաճյուղի անդամների շրջանում՝ ձերբակալելով 7 մարդու:
Ինքնալուծարման պաշտոնական պատճառներն ակումբի անդամները չեն նշում: Ոստիկանությունը ենթադրում է, որ բայքերները ցանկանում են ազատվել ոստիկանության չափազանց մեծ ուշադրությունից: Իրավապահ մարմինները չեն բացառում, որ միավորումը կվերածնվի նոր ձևով:
Հեննինգսդորֆի «Բանդիդոս» ակումբը համարվում է ամենաազդեցիկը Գերմանիայում: Նրա առաջնորդը՝ 38-ամա Տորստենը, երկրի բայքերական վերնախավից է և իրավունք ունի պատժամիջոցեր սահմանելու ակումբի անդամ դավաճանների կամ «դասալիքների» նկատմամբ: Տորստենը իր կարիերան սկսել է ոստիկանությունում, սակայն հեռացվել բռնություն գործադրելու համար, որից հետո սկսել է աշխատել որպես թիկնապահ: 1997 թ. նա հարձակում է գործել Գերմանիայի ավտոմոբիլային ընկերության այն ժամանակվա ղեկավար Վոլֆ Վագների վրա, ինչի համար ենթարկվել է 7 տարվա ազատազրկման: Վերջին մի քանի տարիներին նա գլխավորում էր Հեննինգսդորֆի «Բանդիդոս» ակումբը:
Ոստիկանությունը հետևում է բայքերական ակումբներին՝ կապված կազմակերպված հանցավորությանը նրանց մասնակցության հետ:
