Բրիտանական Հարթֆորդշիր կոմսությունում գողացվել է Հենրի Մուրի հեղինակած բրոնզե քանդակը, որը գտնվել է այն տան հարևանությամբ, որտեղ բնակվել է քանդակագործը: Ինչպես տեղեկացնում է Reuters-ը, գողացված «Արևային ժամացույց 1965» ստեղծագործությունը գնահատվում է 500 հազար ֆունտ ստերլինգ (770 հազար դոլար):
Քանդակն իրենից ներկայացնում է երկու միակցված բրոնզե կիսալուսին: Ոստիկանությունը ենթադրում է, որ գողերը պատրաստվում են այն հանձնել որպես մետաղի ջարդոն:
2005 թվականին անհայտ անձինք գողացել էին Մուրի «Պառկած ֆիգուր» քանդակը:
Նշվում է, որ բրոնզում պարունակվող պղնձի գինը վերջին 3 տարիներին կրկնակի աճել է, ինչի պատճառով կտրուկ մեծացել է արվեստի գործերի, հուշատախտակների և այդ մետաղից պատրաստված այլ իրերի գողությունների թիվը:
