Թուրքական Cihan լրատվական գործակալության փոխանցմամբ՝ Թուրքիայի հարավարևելյան նահանգներում բախումներ են տեղի ունեցել թուրքական անվտանգության ուժերի ու «Քրդստանի աշխատավորական» կուսակցության (PKK) զինյալների միջև: Դրանցից առաջինը գրանցվել է Շըրնաքի նահանգի Կատո լեռան շրջանում՝ Հաքքարիի հետ սահմանին:
Բախումը տեղի է ունեցել երեկ առավոտյան, երբ տվյալ հատվածում պարեկություն կատարող անվտանգության ուժերը հանդիպել են քուրդ զինյալներին: Բախման հետևանքով զոհվել է 1 և վիրավորվել է 3 զինծառայող:
Մյուս բախումը գրանցվել է երեկ` ուշ երեկոյան, Հաթայի նահանգի Իսքենդերունի շրջանում: Այստեղ տեղի ունեցած բախման ժամանակ PKK-ի զինյալները սպանել են մեկ գյուղական պահապանի:
Հիշեցնենք, որ երեք օր առաջ Թուրքիայի պաշտպանության նախարար Իսմեթ Յըլմազը տվյալներ էր ներկայացրել PKK-ի դեմ պայքարում թուրքական անվտանգության ուժերի կրած կորուստների մասին: Իսմեթ Յըլմազը` հիշեցնելով, որ Թուրքիայում PKK-ի ակտիվ զինված պայքարը սկսվել է 1984 թվականին, հայտարարել է, որ 2012 թվականի հունիսի 8-ի դրությամբ այդ պայքարում զոհվել է 6169 և վիրավորվել 4008 զինծառայող:
Յըլմազի խոսքերով՝ զոհված զինծառայողներից 411-ը սպաներ են, 375-ը՝ ենթասպաներ, 585-ը՝ սերժանտներ, իսկ 4798-ը՝ շարքայիններ, ընդհանուր՝ 6169 զինծառայող: Վիրավոր զինծառայողների պարագայում պատկերը հետևյալն է՝ 256 սպա, 263 ենթասպա, 401 սերժանտ, 3088 շարքային, ընդհանուր՝ 4008 զինծառայող:
