ԱՄՆ Պաշտպանության նախարարությունը հրաժարվել է իր կողմից Կոնգրեսին ներկայացվող զեկույցները 10 էջով կրճատելու փորձից: Ինչպես հաղորդում է Fox News-ը, 1 տարի շարունակվող փորձից հրաժարվելու մտադրության մասին հայտարարել է գերատեսչության մամուլի քարտուղար Ջորջ Լիթլը:
Պենտագոնի ներկայացուցչի խոսքերով՝ նախարարությունը պարզապես ցանկանում էր Կոնգրեսին ներկայացնել սեղմ զեկույցներ, սակայն այդ մտադրությունը սխալ են մեկնաբանել: Նոր օրենքների համաձայն՝ փասթաղթերը պետք է սեղմ լինեն, բայց կզբաղեցնեն նույնքան էջ, որքան որ պահանջվի:
Այդ հարցում իր քաղաքականությունը նախարարությունը փոխել է Ներկայացուցիչների պալատի՝ զինված ուժերի հարցերով կոմիտեի կոնգրեսականների բողոքից հետո: Կոմիտեի նախագահ հանրապետական Բաք Մաքքեոնը հուլիսի 11-ին վրդովմունք է հայտնել, որ Պենտագոնի կողմից ներկայացված Չինաստանի բանակի մասին վերջին զեկույցը ընդամենը 15 էջ էր: Կոնգրեսականը հետաքրքրվել էր, թե ինչու է զեկույցն այդքան կարճ, որից հետո նրան հայտնել էին գործող կանոնի մասին:
Ինչպես հաղորդում է The Hill-ը, Մաքքեոնը նամակ է հղել ԱՄՆ պաշտպանության նախարար Լեոն Պանետային՝ պահանջելով 24 ժամվա ընթացքում չեղյալ համարել այդ փորձը: Երբ այդ ժամանակը սպառվել է, Մաքքեոնը սպառնացել է արգելափակել Պենտագոնի համար նախատեսվող 8 մլրդ դոլարը:
Fox News-ը նշում է, որ ըստ կոնգրեսականի օգնականների՝ Չինաստանի զինված ուժերի վերաբերյալ զեկույցում բացակայում էր 3 մաս, որոնք պետք է դրանում ներառված լինեին՝ համաձայն գործող կանոնների: Բացի այդ՝ փաստաթղթում չէր հիշատակվում ընթացիկ տարում Չինաստանի զինված ուժերում տեղի ունեցած կարևոր իրադարձությունների մասին:
