Իտալիան ու Իռլանդիան եվրոգոտուց դուրս գալու ավելի շատ պատճառ ունեն, քան Հունաստանը, ու այդ քայլը երկրների տնտեսությունների վրա կարող է դրական ազդեցություն ունենալ: Bloomberg գործակալությունը ներկայացնում է Bank of America Merrill Lynch-ի հետազոտության արդյունքները` հիմնված տնտեսական արդյունավետության ու խաղերի տեսության վրա:
«Ներդրողները թերագնահատում են արժութային միությունից ինքնակամ դուրս գալու հնարավորությունը: Մեր վերլուծությունը պարունակում է որոշ անսպասելի արդյունքներ, որոնք կարող են հետաքրքիր թվալ անգամ նրանց, ովքեր համաձայն չեն մեր եզրակացությունների հետ»,- գրում են փորձագետները:
Մասնավորապես, տնտեսագետները հաշվարկել են, որ եվրոգոտու` տնտեսության մեծությամբ երրորդ երկրին` Իտալիային, ավելի շահավետ է կարգավորված կերպով դուրս գալ արժութային միությունից, քան մյուսներին:
BofA Merrill Lynch-ի կարծիքով` ազգային արժույթին վերադառնալու հաշվին Իտալիան կշահի տնտեսական ցուցանիշների բարելավումից, մրցունակության ամրապնդումից ու բալանսավորված հաշվի օպտիմիզացիայից:
BofA Merrill Lynch-ի վերլուծաբանները գնահատել են Իտալիայի տնտեսական աճը եվրոգոտուց դուրս գալու ազդեցությունը, պետական արժեթղթերի ու բալանսավորված հաշիվների եկամտաբերության դինամիկան:
Որքան բարձր է ստացված պայմանական ինդեքսը, այնքան ծանր է երկրի համար միասնական մեկ արժույթից հրաժարումը: Որքան ցածր է ցուցանիշը, այնքան ավելի մեծ է օգուտը երկրի համար եվրոյից հրաժարվելու դեպքում:
