«Բարգավաճ Հայաստան» կուսակցության պատգամավոր Տիգրան Ուրիխանյանը մտավախություն չունի, որ «Հարսնաքար»-ի հարցով ԱԺ արտահերթ նիստ գումարելու համար անհրաժեշտ 44 ստորագրություն չհավաքելու և գործընթացն այսպիսով ձախողելու դեպքում Կոնգրեսը ամբողջ մեղքը կբարդի իր՝ ԲՀԿ-ի վրա՝ պատճառաբանելով, որ անհաջողությունը հետևանք է ԲՀԿ փոքրաթիվ պատգամավորների ներկայության և նրանց ստորագրությունների պակասի: Այս մասին Ուրխանյանն ասաց «Առաջին լրատվական»-ի հետ զրույցում:
«Եթե անգամ ամեն ինչ հաջողվի և արտահերթ նիստը գումարվի, միևնույն է՝ քվորում չի լինելու: Եթե ՀՀԿ-ն չի մասնակցելու նիստին և չի քվերակելու, ո՞րն է այս նախաձեռնության իմաստը. քաղաքական ակցիա՞ն»,- հարց հնչեցրեց ԲՀԿ պատգամավորը:
Տիգրան Ուրիխանյանի խոսքով՝ ՀԱԿ-ը չի կարող մեղադրել իրենց անհրաժեշտ թվով ստորագրություններ չապահովելու համար, քանի որ կուսակցության մի շարք պատգամավորներ գործուղման կամ հանգստի նպատակով մեկնել են հանրապետությունից: «Խորհրդարանը երկուշաբթի օրվանից պաշտոնապես արձակուրդի մեջ է: Այնպես որ, մարդկանց մեղադրել, թե ինչու են բացակայում արձակուրդների ժամանակ, անհեթեթ է: Միաժամանակ, ԲՀԿ այն պատգամավորները, որ այժմ Հայաստանում են, միացել են ստորագրահավաքին, միացել եմ նաև ես»,- ասաց նա:
Ամփոփելով՝ ԲՀԿ պատգամավորը նշեց, որ «Հարսնաքար»-ի հարցով ԱԺ արտահերթ նիստ գումարելու նախաձեռնության շրջանակներում իրենք գործում են իրենց խղճի և բարոյականության շրջանակներում:
Հիշեցնենք, որ ՀԱԿ-ը երեկ` հուլիսի 11-ին, ԱԺ քարտուղարությունից վերցրել է անհրաժեշտ ձևաթղթերը` արտահերթ նիստ գումարելու պահանջով ստորագրություններ հավաքելու նպատակով: Նիստ գումարելու համար այսօր մինչև երեկոյան ժամը 18.00-ն պետք է հավաքել 44 պատգամավորի ստորագրություն:
