Ազգային ժողովի էթիկայի հանձնաժողովի նախագահի և փոխնախագահի պաշտոնները ռոտացիոն կարգով չեն փոխանցվում, դրանք ԱԺ խոշոր դիմադիր և ընդդիմադիր խմբակցությունների մենաշնորհն են, և դա ամենամեծ բացասական կողմն է: Այսօր լրագրողների հետ հանդիպմանը նման տեսակետ հայտնեց ԱԺ ՀՅԴ խմբակցության պատգամավոր, հանձնաժողովի անդամ Արծվիկ Մինասյանը:
Նա տեղեկացրեց, որ հանձնաժողովն ինքնուրույն վարույթ հարուցելու իրավասություն չունի, և դրա համար անհրաժեշտ է դիմում որևէ անձի կամ կազմակերպության կողմից: Մինասյանի խոսքով` եթե ստացվի դիմում, որ այսինչ պատգամավորը զբաղվում է ձեռներեցությամբ, հանձնաժողովի անդամը հետամուտ կլինի գործի քննությանը, և համապատասխան եզրակացություն կտրվի:
Դիմումներ կարող են տալ նաև գործընկերները գործընկերների հանդեպ, սակայն միաժամանակ, նրա խոսքով, ցանկալի չէ, որ հենց հանձնաժողովի անդամները տան նման դիմումներ, որովհետև այդ դեպքում չեն կարողանա ավելի անկաշկանդ գործել:
«Եթե հանձնաժողովը հանգեց այն եզրակացության, որ «իքս» անձը ձեռնարկատիրությամբ է զբաղվել, և շահերի բախում կա, հարցը ներկայացվում է ԱԺ լիագումար նիստին և քննարկվում ու քվեարկվում է պատգամավորին լիազորություններից զրկելու հարցը»,- ասաց Ա. Մինասյանը` հավելելով, որ կարող է որոշվել նաև, որ տվյալ պատգամավորը ձեռնարկատիրությամբ չի զբաղվում: Իրավական տեսակետից հանձնաժողովը այլ գործողություն իրականացնել չի կարող:
