ՀՀ փոխվարչապետ, տարածքային կառավարման նախարար Արմեն Գևորգյանն այսօր ընդունել է Գերմանական զարգացման բանկի (KfW) պատվիրակությանը` բանկի փոխնախագահ Եվա Վիտի գլխավորությամբ:
ՏԿՆ հասարակայնության հետ կապերի բաժնից «Առաջին լրատվական»-ին հայտնում են, որ քննարկվել է բանկի աջակցությամբ Հայաստանում իրականացվող ծրագրերի ընթացքը, որոնք ընդգրկում են էներգետիկ, ջրամատակարարման, ջրամբարաշինության, բնապահպանական, գյուղատնտեսական և ֆինանսական ոլորտները: Նշվել է, որ բանկի հետ համագործակցության ընթացքում տարբեր ծրագրերի համար ընդհանուր առմամբ հատկացվել է 450 մլն եվրո, և բանկն ամրապնդում է դիրքերը` որպես Հայաստանի առաջատար գործընկերներից մեկը: Քննարկվել են մարզերում ենթակառուցվածքների զարգացմանն ուղղված ընթացիկ և հեռանկարային ծրագրերի հետ կապված հարցեր:
Երկուստեք կարևորվել է «Լոռի-ջրմուղկոյուղի», «Շիրակ-ջրմուղկոյուղի» և «Նոր Ակունք» ընկերությունների կողմից պայմանագրային պարտավորությունների ամբողջ ծավալով իրականացման խնդիրը: Ա. Գևորգյանը ողջունել է Կապսի ջրամբարի վերակառուցմանն աջակցելու բանկի պատրաստակամությունը` նշելով, որ ջրամբարների կառուցման հարցն առաջնային է կառավարության համար:
Անդրադարձ է եղել նաև «Վանաձոր քաղաքի կոշտ կենցաղային աղբի համակողմանի կառավարման հայեցակարգ» ծրագրի ընթացքին, որը ևս իրականացվում է բանկի օժանդակությամբ: Կողմերը հույս են հայտնել, որ ծրագիրը հաջողությամբ կյանքի կկոչվի և կնպաստի համայնքի համար կարևոր նշանակություն ունեցող խնդրի լուծմանը:
Վիտը գոհունակություն է հայտնել Հայաստանում իրականացվող ծրագրերի ընթացքից: Նա տեղեկացրել է, որ առաջիկայում բանկը տարածաշրջանային նոր տնօրեն կունենա և վստահություն հայտնել, որ փոխգործակցության բարձր մակարդակը կպահպանվի:
Կողմերն անդրադարձել են նաև աշնանը կայանալիք հայ-գերմանական միջկառավարական հանձնաժողովի նիստին և կարևորել առաջիկա տարիների համար նախանշված ծրագրերի քննարկումն ու հաստատումը:
