Այսօր առավոտից Աբովյան և Չարենցավան քաղաքների 10 երթուղիների շուրջ 100 աշխատակիցներ գործադուլ են հայտարարել: Ընդհանուր առմամբ երթուղի դուրս չի եկել թվով 45 տրանսպորտային միջոց: Դրանք սպասարկում են ինչպես Երևան-Աբովյան, Երևան-Չարենցավան, այնպես էլ ներքաղաքային երթուղիները: Երթուղիները պատկանում են «Քինգ դե լյուքս» ընկերությանը, որի ղեկավարը ԲՀԿ առաջնորդ Գագիկ Ծառուկյանի սանիկն է՝ Արթուր Հարությունյանը (Պալաչ):
Հայտնի է, որ վերջին ժամանակահատվածում Գագիկ Ծառուկյանի կողմից երթուղի են դուրս եկել անվճար ուղևորափոխադրումներ իրականացնող ավտոբուսներ: Ծառուկյանի այս գործունեության արդյունքում տուժել է Արթուր Հարությունյանի «Քինգ դե լյուքս» ընկերությունը:
Ընկերության տնօրեն Արթուր Դալլաքյանը «Առաջին լրատվական»-ի հետ զրույցում նշեց, որ ընդհանուր առմամբ իրենց ընկերությունը կրել է 800 հազար դոլարի վնաս, քանի որ բարեգործական ավտոբուսների պատճառով իրենց երթուղիներից քիչ թվով մարդիկ են օգտվում:
Նրա խոսքով՝ վարորդները հայտարարել են, որ այլևս չեն պատրաստվում այդ պայմաններում աշխատել, քանի որ 5-6 ամիս է՝ վնասով են աշխատում:
«Քինգ դե լյուքս» ընկերությունը հայտարարում է, որ պայքարելու է մինչև վերջ, որպեսզի Ծառուկյանի՝ անօրինական կերպով երթուղի մտած ավտոբուսները դադարեցնեն իրենց աշխատանքը:
Դալլաքյանը նշեց, որ իրենք չեն ուզում քաղաքականացնել հարցը, որովհետև քաղաքականության մեջ պետք է քաղաքակիրթ պայքար լինի:
«Մենք շատ ուրախ կլինեինք, եթե Ծառուկյանը գոնե 50 աշխատատեղ բացեր Աբովյանում, սակայն նա դա չի արել, բայց այսօր փորձում է քանդել 100 աշխատատեղ»,- նշեց ընկերության տնօրենը:
Վաղվանից գործադուլավորներին կմիանան շուրջ 120 տաքսիների վարորդներ:
Հիշեցնենք, որ Արթուր Հարությունյանի (Պալաչի) և Գագիկ Ծառուկյանի հարաբերությունները սրվել են: