«Հայաստանի և ողջ հայ ազգի համար նոր դարաշրջան է սկսվում, քանի որ եթե նախկինում ՀՀ-ն մասնակցում էր տարբեր գիտական նախագծերի, հայկական մասնագետների գիտական մտքի օգնությամբ ստեղծվում էին լուսնագնացներ, ապա այսօր սա ոչ թե վերադարձ է դրան, այլ կապի և հեռահաղորդակցության ազգային արբանյակի արձակումը բոլորովին նոր հարթությունում է և արմատականներ է բերելու և՛ կրթության, և՛ գիտության, և՛ տեխնիկայի, և՛ արտադրական նորարարությունների ոլորտներում»,- «Առաջին լրատվական»-ի հետ զրույցում հայկական կապի արբանյակի ստեղծման մասին ՀՀ և ՌԴ միջև ստորագրված հուշագիրը նման կերպ գնահատեց ՀՀ-ում ՌԴ արտակարգ և լիազոր դեսպանի խորհրդական, Հայաստանում «Ռոսսոտրուդնիչեստվո»-ի հայաստանյան ներկայացուցչության ղեկավար Վիկտոր Կրիվոպուսկովը:
Նրա բնորոշմամբ՝ սա կբերի բոլորովին նոր մտածելակերպ և, իհարկե, կամրապնդի ռուսական գիտական նանոտեխնիկական մտքի հետ կապերը և այն տիեզերական ուսումնասիրությունների ծրագրերի հետ, որոցում այսօր Ռուսաստանն առաջատար է: Վ.Կրիվոպուսկովի կարծիքով՝ այս երկու բաղադրիչների միավորումը ՀՀ-ին մեծ օգուտ կբերի:
Կապի և հեռահաղորդակցության ազգային արբանյակի ստեղծման ծրագիրը նախատեսված է 20 տարվա համար: Վ.Կրիվոպուսկովի խոսքով՝ դեռ վաղ է խոսել ներդրումների ծավալների մասին, առայժմ միայն հուշագիրն է ստորագրվել: Նա նշեց, որ պետք է մի կառույց ստեղծվի, որը «Ռոսկոսմոս»-ի հետ կսկսի մշակել արբանյակի ստեղծման նախագիծը:
«Ներդրումները ենթադրվում են, քանի որ այն կապի արբանյակ է և պետք է պետությանը եկամուտ բերի, մասնավոր ներդրումների ներգրավումը ցանկալի է: Բայց դա երկրորդական հարց է: Կարևոր է, որ արվել են առաջին քայլերը, և շնորհավորում եմ Ձեզ այդ կապակցությամբ»,- ասաց Վ.Կրիվոպուսկովը:
ՀՀ տրանսպորտի և կապի նախարարությունից «Առաջին լրատվական»-ին հայտնեցին, որ նախարար Գագիկ Բեգլարյանը ներկայում Լոնդոնում է, որտեղ և ստորագրվել է հուշագիրը: Վաղը նա վերադառնալու է, և արբանյակի ստեղծման ծրագիրը մանրամասն կներկայացվի հանրությանը:
Հիշեցնենք, որ «Ռոսկոսմոս»-ի ղեկավար Վլադիմիր Պոպովկինը ասուլիսում հայտնել էր, որ Հայաստանի համար նախատեսված արբանյակը ստեղծվելու է ռուսական «Տեղեկատվական արբանյակային համակարգեր» ԲԲԸ-ում:
