Աշխատանքային այցով Քաջարանում էր ՄԱԿ-ի համակարգող Դաֆինա Գեռչևան: Սա նրա երկրորդ այցն է Սյունիք: Այցի նպատակը ՄԱԿ-ի զարգացման ծրագրի կողմից Սյունիքում իրականացվող աշխատանքներին տեղում ծանոթանալն է: Մասնավորապես` քաղաքի մանկապարտեզում ներդրված էներգախնայողության ծրագրին: Տիկին Գեռչևայի խոսքով, ինքը անցած տարի հոկտեմբերին է եղել Սյունիքում, հասել ամենահարավային քաղաքը` Մեղրի: Օգտվելով առիթից` նաև Տաթև է գնացել, «ճախրել» աշխարհի ամենաերկար ճոպանուղու հաճույքը: «Ասեմ, որ ձմռանն էլ է այստեղ հաճելի: Չնայած ձյուն էր, ճանապարհը մի քիչ սառել էր, բայց ես հետաքրքրության զգացումով տեղ հասա»,- ասաց ՄԱԿ-ի զարգացման ծրագրի Հայաստանի մշտական ներկայացուցիչը` կես կատակ-կես լուրջ հավելելով, որ եթե սյունեցիները հանդուրժեն, էլի կգա: