Ռումինիայի նախագահ Տրայան Բեսեսկուն հուլիսի 10-ին պաշտոնապես գերագույն իշխանությունը փոխանցել է խորհրդարանի խոսնակ Կրին Անտոնեսկուին: Ինչպես հաղորդում է Agence France-Presse-ը, Բեսեսկուն նման քայլի է դիմել Սահմանադրական դատարանի կողմից խորհրդարանի՝ նախագահին իմփիչմենթ հայտարարելու որոշմանը համաձայնություն տալուց հետո:
Անտոնեսկուն արդեն երդվել է՝ որպես պետության անցումային ղեկավար: Արարողությունը եղել է համեստ և տեղի է ունեցել փակ ռեժիմով: Հուլիսի 29-ին Ռումինիայում պետք է տեղի ունենա հանրաքվե, որը կհաստատի կամ չեղյալ կհամարի նախագահին իմփիչմենթ հայտարարելու խորհրդարանի որոշումը: Ինչ տեղի կունենա, եթե Բեսեսկուն որոշի ինքնուրույն հրաժարվել իշխանությունից՝ առայժմ հայտնի չէ:
Հուլիսի 6-ին 256 ռումինացի պատգամավորներ (432-ից) կողմ արտահայտվեցին նախագահին պաշտոնից հեռացնելուն: Նրանք Բեսեկուին մեղադրում են դատարանի վրա ճնշում գործադրելու և ծառայողական լիազորությունները չարաշահելու մեջ, քանի որ նա փաստացիորեն սկսել էր իրականացնել ֆինանսների նախարարի գործառույթները և միակողմանի կերպով երկրում մտցրել էր կոշտ տնտեսական քաղաքականության միջոցառումներ:
Այդ միջոցառումները հանգեցրել էին երկրում զանգվածային բողոքի ցույցերի և ծանր քաղաքական ճգնաժամի. տարվա սկզբից Ռումինիայում փոխվել է երկու կառավարություն:
Իմփիչմենթի գործընթացը ուժեղ քննադատութան է ենթարկվել ԵՄ-ում Ռումինիայի գործընկերների և ԱՄՆ-ի կողմից: Բեռլինը և Վաշինգտոնը, մասնավորապես, կասկածի տակ են դրել Բեսեսկուին նման ձևով իշխանությունից հեռացնելու օրինականությունը:
Արևմուտքի կողմից աջակցությունը Բեսեսկուին պայմանավորված է հիմնականում այն հանգամանքով, որ նա հետևում էր միջազգային ֆինանսական ինստիտուտների խորհուրդներին երկրի պետծախսերը կրճատելու հարցում: Բեսեսկուի հակառակորդները՝ ձախ ուժերը, ընդհակառակը, պահանջում են ավելացնել պետծախսերը տնտեսության կենսունակությունը պահելու համար:
Եթե Ռումինիայի նախագահն, այնուամենայնիվ, հեռացվի իշխանությունից, ապա արտահերթ նախագահական և խորհրդարանական ընտրությունները տեղի կունենան արդեն աշնանը:
