Հայտնի դերասան Ջոնի Դեփը և գրող, պատմաբան Դուգլաս Բրինկլին գարնանը ընթերցողի դատին կհանձնեն նախկինում չհրապարակված «Երկրի տունը» (House of Earth) վեպը, որի հեղինակը քանթրի և ժողովրդական երգիչ ամերիկացի Վուդի Գաթրին է: Այս մասին հաղորդում է The New York Times-ը:
Գիրքը պատմում է Տեխասի արևելքի մի զույգի մասին, որը կառուցում է կավապատ տուն` վատ եղանակից պաշտպանվելու համար, և պայքարում է բանկերի և փայտանյութ արտադրող ընկերությունների դեմ:
Այդ պատմության հիմքում ընկած է գյուղական ռեալիզմի և պրոլետարիատի միջև բողոքը, այն հիանալի կերպով արտացոլում է մարգինալների կյանքը Մեծ դեպրեսիայի տարիներին:
Դուգլաս Բրինկլին Ջոնի Դեփի հետ ծանոթացել է 90-ականների կեսերին:
Վուդի Գաթրին ծնվել է 1912 թվականին՝ Օկլահոմայում: Սովորելով կիթառ նվագել` նա ուղևորվել է Կալիֆոռնիա, որտեղ նրան հրավիրել են ռադիոկայան՝ վարելու երաժշտական նախագիծ: Ծրագրի շրջանակում նա կատարել է իր երգերը: 1942 թվականին նա Miss Pavlichenko երգը նվիրել է խորհրդային դիպուկահար Լյուդմիլա Պավլիչենկոյին, որը ԱՄՆ էր այցելել խորհրդային պատվիրակության կազմում:
Գաթրիի ինքնակենսագրությունը` «Փառքի ճանապարհին» (Bound for Glory), լույս է տեսել 1943 թվականին, ինչը զգալիորեն բարձրացրել է հանրության հետաքրքրությունը ժողովրդական երաժշտության նկատմամբ:
Երկրորդ աշխարհամարտի տարիներին Գաթրին գրել է երգեր, որոնցով ԱՄՆ-ին կոչ է արել չմիջամտել եվրոպական հակամարտությանը: Նա ստեղծագործել է նաև պատերազմի ավարտից հետո: Նրա ստեղծագործությունները գլխավորապես նվիրված են եղել Ամերիկայի կյանքին և սոցիալական անհավասարությանը:
Գաթրին մահացել է 1967 թվականին:
Ամեն տարի Օկլահոմա նահանգում անցկացվում է ժողովրդական երաժշտության փառատոն՝ նվիրված Գաթրիին (Woody Guthrie Folk Festival):
