Ինչպես հայտնի է, հուլիսի 2-ին ԱԺ չորս խմբակցությունների՝ ՀՅԴ, «Ժառանգություն», ԲՀԿ և ՀԱԿ ղեկավարները դիմել էին ԱԺ նախագահ Հովիկ Աբրահամյանին` առաջարկելով հանդիպում կազմակերպել հունիսի 17-ին «Հարսնաքար» ռեստորանային համալիրում դաժան և անմարդկային հաշվեհարդարի արդյունքում սպանված ՀՀ ՊՆ Կենտրոնական կլինիկական զինվորական հոսպիտալի ԼՕՌ բաժանմունքի պետ, մայոր Վահե Ավետյանի գործի քննության համար պատասխանատու իրավապահ մարմինների ղեկավարների հետ՝ գործի ընթացքի վերաբերյալ հասարակությանը հուզող հարցերին պատգամավորներին պարզաբանումներ տալու և հարցադրումներին պատասխանելու նպատակով:
«Առաջին լրատվական»-ը «Ազատ դեմոկրատներ» կուսակցության և ԱԺ «Ժառանգություն» խմբակցության անդամ Ալեքսանդր Արզումանյանից փորձեց ճշտել, թե ինչ ճակատագիր է ունեցել վերոնշյալ դիմումը: Արզումանյանը մեզ փոխանցեց, որ երեկ ստացվել է Հովիկ Աբրահամյանի պատասխանը, որով վերջինս մերժել է չորս խմբակցությունների ղեկավարների առաջարկը` պատճառաբանելով, թե ԱԺ նախագահը պաշտոնատար անձանց հետ հանդիպումներ կազմակերպելու իրավասություն չունի և ձեռնպահ է մնում գործի քննության համար պատասխանատու իրավապահ մարմինների գործունեությանը օրենքով չնախատեսված որևէ միջամտությունից:
Ալեքսանդր Արզումանյանը տեղեկացրեց, որ այսօր ԱԺ չորս խմբակցությունների ներկայացուցիչները հանդիպել են և որոշել իրենց լիազորությունների շրջանակներում կազմել մեկ ընդհանուր հարցաշար և դրանք ներկայացնել Ավետյանի գործով պատասխանատու իրավապահ մարմինների ղեկավարներին:
«Իր հերթին «Ժառանգություն» խմբակցությունը նաև որոշել է այդ հարցաշարի պատասխանները ստանալուց հետո նախաձեռնել քաղաքացիների ֆորում, որը կքննարկի Հայաստանում անպատժելիության և ամենաթողության երևույթները և կառաջարկի ապագայում դրանք կանխարգելելու քայլեր»,- տեղեկացրեց Ալեքսանդր Արզումանյանը:
