Վենեսուելայի նախագահ Ուգո Չավեսը երկուշաբթի քննադատության է ենթարկել ԱՄՆ պետքարտուղար Հիլարի Քլինթոնին՝ Ռուսատսանի և Չինաստանի հասցեին Սիրիայի հարցով «խելագար» արտահայտությունների համար,- հաղորդում է RIA Novosti-ն:
Անցյալ շաբաթ Քլինթոնը կոչ էր արել այսպես կոչված «Սիրիայի բարեկամների խմբի» բոլոր անդամ երկրներին ճնշում գործադրել Չինաստանի և Ռուսաստանի վրա, որոնք, նրա կարծիքով, արգելափակում են Սիրիայի հակամարտության կարգավորման գործընթացը:
«Մենք սպառնալիքներ տեսել ենք տիկին պետքարտուղարի կղմից Չինաստանի և Ռուսաստանի հասցեին, որ իբր նրանք թանկ կվճարեն, եթե չկատարեն այն, ինչ իրենք են պահանջում: Դուք հասկանո՞ւմ եք: Դա արդեն ակնհայտ, բացահայտ խելագարություն է նրանց կողմից, ովքեր իրենց համարում են աշխարհի տերեր»,- ասել է Չավեսը երկուշաբթի Կարակասում տեղի ունեցած մամուլի ասուլիսում:
Չավեսի կարծիքով՝ Քլինթոնը պետք է առաջին հերթին մտածի՝ ինչպես լուծել սեփական երկրի խնդիրները: «Խնդիրները հենց ԱՄՆ-ում բավական են, բայց նրանք (ԱՄՆ իշխանությունները.- 1in.am) ցանկանում են (Սիրիայի հետ.- 1in.am) անել նույնը, ինչ արեցին Լիբիայում»,- ասել է Վենեսուելայի նախագահը:
