«Վերջնական կարգավորման առումով աստրախանյան հանդիպումը առաջընթաց չարձանագրեց, եւ չի էլ արձանագրվելու, քանի որ այն ռազմավարությունը, որը կա բանակցային գործընթացում, ի վերջո տանելու է փակուղի կամ ռազմական բախման»,- մեզ հետ զրույցում կարծիք հայտնեց «Սարդարապատ» շարժման նախաձեռնող խմբի անդամ Հայկ Բալանյանը:
Նրա խոսքերով, այն քաղաքականությունը, որը կետ առ կետ իրականացնում է Ադրբեջանը, այս անգամ եւս իր արդյունքը տվեց, որովհետեւ այն հայտարարություններում, որոնք արվեցին հանդիպումից հետո, ոչ մի խոսք չի եղել Ղարաբաղի անկախության կամ մասնակցության մասին. «Կար ընդամենը երկու ուշագրավ արտահայտություն` ռազմագերիների փոխանակում, որը նշանակում է, որ Հայաստանի եւ Ադրբեջանի միջեւ պատերազմը շարունակվում է: Երկրորդն էլ այն էր, որ Մեդվեդեւը հայտարարեց, թե հետագայում հնարավոր է` խաղաղության պայմանագիր ստորագրվի, որն էլ ենթադրում է, որ պետք է կնքվի ոչ թե պայմանագիր, որի համաձայն` Ղարաբաղը կդառնա անկախ պետություն, այլ Հայաստանն ու Ադրբեջանը պետք է ստորագրեն խաղաղության պայմանագիր: Սա Ադրբեջանի համար, իհարկե, հաջողություն է, Ռուսաստանի համար եւս, քանի որ այս ձեւաչափով ինքը փորձում է վերահսկել կարգավորումը»:
Ըստ Բալանյանի` Ռուսաստանի նպատակը մեկն է` դուրս մղել կարգավորման գործընթացից ԵՄ-ին եւ ԱՄՆ-ին. «Հայաստանն այստեղ գործոն չէ, նա պարզապես լսում է, թե իրեն ինչ կհրամայեն: Անկասկած, մեր իշխանությունների կողմից ընտրված նման ռազմավարությունը բերելու է այնպիսի մի հանգրվանի, երբ Հայաստանն իսկապես այլընտրանք չի ունենա, եւ մենք կկանգնենք ուղղակի բախման կամ միջազգային մեկուսացման առջեւ»: