Քիչ առաջ արաբական աղբյուրները տարածեցին տեղեկություն, համաձայն որի` Եգիպտոսի նախագահի աշխատակազմը պատրաստվում է կարևոր և շտապ հայտարարություն անել: Այս մասին հայտնել է նաև պետական հեռուստատեսությունը: Հայտարարության բովանդակության վերաբերյալ տեղեկություններ դեռ չկան:
BBC-ն հաղորդում է, որ իշխող կուսակցության նորանշանակ ղեկավար Հուսամ Բադրաուին պատրաստվում է հրաժարական տալ. «Առաջիկա ժամերին ես կհայտարարեմ հրաժարականի մասին»:
Եգիպտոսի տարբեր քաղաքներից տեղեկություններ են ստացվում, որ կրկին սկսել են բախումներ: Մասնավորապես Ալ-Արիշ քաղաքում մոտ 1,000 ցուցարարներ հարձակվել են տեղի ոստիկանության վրա: Կան տուժածներ: Բացի այդ, ռուսական Vesti.ru-ն հայտնում է, որ նախագահական նստավայրի մոտ քաղաքացիական հագուստով ոստիկանները, ինչպես նաև մի խումբ երիտասարդներ հարձակվում են ընդդիմադիր ցուցարարների վրա: Ոստիկանությունը չի միջամտում:
Al-Jazeera հեռուստաընկերությունը հայտնում է, որ Մուբարաքն ընտանիքով մեկնել է ավելի հանգիստ` Շարմ Ալ-Շեյխ նստավայր: BBC-ն հաղորդում է, որ Կահիրեի նախագահական նստավայրից առնվազն երկու ռազմական ուղղաթիռ է մեկնել:
