Հարավային Կորեայում ԱՄՆ-ի զորքերի հրամանատար գեներալ Ջեյմս Թուրմանը ներողություն է խնդրել ամերիկացի զինվորակաների կողմից կայանման հետ կապված վեճի պատճառով 3 կորեացիների ձերբակալելու համար: Այս մասին հաղորդում է The New York Times-ը:
«Ես շատ եմ ցավում, որ դա տեղի է ունեցել,- հայտարարել է Թուրմանը:- Ես ցանկանում եմ անկեղծ ներողություն խնդրել»: Ինչպես հաղորդում է հարավկորեական Renhap գործակալությունը, ԱՄՆ-ի և Հարավային Կորեայի ներկայացուցիչները համաձայնության են եկել քննարկել ամերիկյան բազայից դուրս գտնվող տարածքների պարեկության հարցը:
The New York Times-ը, վկայակոչելով հարավկորեական ոստիկանությանը, գրում է, որ դեպքը տեղի է ունեցել հուլիսի 5-ին: Ամերիկյան ռազմական ոստիկանության աշխատակիցները պարեկություն են կատարել Պյոնթհեք քաղաքում ամերիկյան բազային հարող փողոցներում: Նրանք տեղի խանութի սեփականատիրոջից պահանջել են փոխել մեքենայի տեղը, որը, նրանց կարծիքով, անօրինական է կայանած եղել: Նրանց միջև վեճ է բռնկվել, արդյունքում ամերիկացիները ձերբակալել են սեփականատիրոջը և ևս երկու կորեացիների:
Միջադեպի մանրամասները հայտնի չեն:
Պյոնթհեքի ոստիկանությունը հետաքննություն է վարում: Մասնավորապես, պետք է պարզվի՝ արդյո՞ք ամերիկացի պարեկներն իրավունք ունեին զբաղվելու բազայի սահմաններից դուրս կայանման հարցերով:
Այս պահին Հարավային Կորեայում տեղակայված է 28,500 ամերիկացի զինվոր:
