Այսօր` հուլիսի 8-ին, 2 անձի վրաերթ է տեղի ունեցել Լոոու մարզում: Այս մասին հայտնում է News.armeniatv.com-ը՝ հղում անելով ֆոտոլրագրող Գագիկ Շամշյանին:
Ժամը 21:10-ի սահմաններում Վանաձորի Բաղրամյան փողոցի վրա` «Գանձակ» սուպերմարկետի մոտակայքում անհայտ մակնիշի և համարանիշի ավտոմեքենայի վարորդը վրաերթի է ենթարկել 2 հոգու և թողնելով անօգնական վիճակում` դիմել փախուստի:
Վրաերթի ենթարկվածները երկու կին են, ովքեր տեղում մահացել են:
Գ. Շամշյանը հայտնել է, որ իր տեղեկություններով, վրաերթը կատարվել է «Օպել» մակնիշի մեքենայով, որի համարանիշներն են` 19 ՏՍ 323: Այն գրանցված է Վանաձոր քաղաքի Ներսիսյան փողոցի 13 շենքի բնակիչ Արթուր Ավետիքյանի անվամբ:
Նշված փողոցում բացակայում է արտաքին լուսավորությունը: Դեպքի վայրում հայտնաբերվել է նշված համարանիշը` վնասված վիճակում:
Դեպքի վայր են ժամանել Ճանապարհային ոստիկանության 2-րդ սպայական գումարտակի 5-րդ վաշտի առաջին դասակի աշխատակիցները` հրամանատար Կարեն Բոյաջյանի գլխավորությամբ:
Տեղում են եղել նաև Ոստիկանության Լոռու մարզային վարչության և Ոստիկանության Վանաձորի բաժնի օպերատիվ-քննչական խմբերը:
Ոստիկանության օպերատիվ խմբերը փորձում են պարզել վրաերթի հետևանքով մահացած անձանց ինքնությունը և հայտնաբերել փախուստի դիմած վարորդին:
