Այսօր «Ժառանգություն» խմբակցության պատգամավոր Անահիտ Բախշյանը նամակ է ուղարկել ՀՀ արտաքին գործերի նախարար պարոն Էդվարդ Նալբանդյանին: Նամակի ամբողջական տեքստը ներկայացնում ենք ստորեւ.
«Հարգելի պարոն Նալբանդյան,
Լրատվությունից տեղեկացա Արտակ Բեգլարյանի` «Քաղաքացին ԱԳՆ-ից պահանջում է իր կրթության իրավունքի հարգում եւ իրացում» հայտարարությանն ու զարմացա, քանի որ էլ ո՞վ, եթե ոչ ՀՀ ԱԳ նախարարությունն` ի դեմս նախարարի, պետք է պաշտպան կանգնի ՀՀ կողմից վավերացված միջազգային կոնվենցիաները ճշտորեն իրականացնելուն, որոնցում ամրագրված է. «հաշմանդամության պատճառով խտրականությունը ցանկացած անձի դեմ բռնություն է` ուղղված անհատի արժանապատվությանն ու արժեքներին»:
ՄԱԿ-ի կողմից ընդունված «Հաշմանդամություն ունեցող անձանց իրավունքների մասին» կոնվենցիան արդեն վավերացվել է ՀՀ Ազգային ժողովի կողմից, եւ ՀՀ նախագահն էլ 2010 թվականի հոկտեմբերի 22-ին այն ստորագրել է, որտեղ գրված է. «Մասնակից պետություններն ապահովում են, որ հաշմանդամություն ունեցող անձանց համար առանց խտրականության ու մյուսների հետ հավասար հիմունքներով մատչելի լինեն ընդհանուր բարձրագույն կրթությունը, մասնագիտական կրթությունը, մեծահասակների ուսուցումը եւ կրթությունն ամբողջ կյանքի ընթացքում»:
Անդրադառնալով ԱԳՆ մամուլի խոսնակի դիտարկմանը` իրեն հիշեցնում եմ միջազգային կոնվենցիաներով սահմանված հաշմանդամների նկատմամբ շատ կարեւոր սկզբունքները` խտրականության բացառում, հարգանք հաշմանդամություն ունեցող անձանց յուրահատուկ լինելու նկատմամբ եւ նրանց` որպես մարդկային բազմազանության եւ մարդկության մաս ընդունելը:
Խնդրում եմ «Ազգային ժողովի կանոնակարգ» ՀՀ օրենքի 7-րդ հոդվածի համաձայն տասնօրյա ժամկետում պատասխանել, թե ինչ հիմքով կամ որ օրենքի համաձայն է մերժվել երիտասարդի կրթություն ստանալու իրավունքը:
Շնորհակալություն համագործակցության համար»: