1952թ. այս օրը Կրասնոդարում ծնվեց կինոռեժիսոր, սցենարիստ, պրոդյուսեր, «Մոսֆիլմ» կոնցեռնի գլխավոր տնօրեն, արվեստի վաստակավոր գործիչ (1997), ՌԴ ժողովրդական արտիստ (2002) Կարեն Շահնազարովը:
Սովորել է Կրասնոդարի թիվ 4 դպրոցում, 1975թ. ավարտել Մոսկվայի կինոինստիտուտի բարձրագույն ռեժիսուրայի ֆակուլտետը (Իգոր Տալակինի արվեստանոցը): 1976 -ից ֆիլմեր է նկարահանում «Մոսֆիլմ» կինոընկերությունում: 1987-ից եղել է «Մոսֆիլմի» մաս կազմող «Ստարտ» ստեղծագործական միավորման (1990-ին վերանվանվել է «Կուրիեր») գեղարվեստական տնօրենը, 1991-ից` «Մոսֆիլմ» կինոկոնցեռնի և «Կուրիեր» ստուդիայի գեղարվեստական ղեկավարն ու վարչության նախագահը:
1998-ին դարձել է «Մոսֆիլմ» կինոկոնցեռնի գլխավոր տնօրենը: Նրա ղեկավարությամբ Ռուսաստանի գլխավոր կինոստուդիան հաղթահարել է 1990-ականների խորը ճգնաժամը և դարձել Եվրոպայի խոշորագույն կինոարտադրական համալիրը:
Շահնազարովի ֆիլմերը ներկայացվել են բազմաթիվ հեղինակավոր միջազգային կինոփառատոներում` արժանանալով ավելի քան 20 մրցանակի: Հայտնի ֆիլմերից են «Անհետացած կայսրություն», «Լիալուսնի օր», «Հիվանդասենյակ թիվ վեց» և այլն:
